“Ekofront” İctimai Birliyinin fəalı Kənan Xəlilzadə Şuşa-Xankəndi yolundakı aksiyanı izləyir. O, aksiyaçıların ekoloji tələblərini səmimi qəbul etmir.

“Bir eko fəal istəməz ki, hər hansı bir mədən istismar edilsin, oradan istifadə edilsin. Eko fəal istəyər ki, o mədən ümumiyyətlə istifadə edilməsin. 

Bu aksiyanın niyyətinin anlamaq çox çətindir. Ortadakı söhbət belədir ki, buranı Ermənistan tərəfi istismar edir”. 

Azərbaycan hökuməti Qarabağda Rusiya Sülhməramlı Kontingentinin yerləşdiyi ərazilərdəki faydalı qazıntı yataqlarının monitorinqini aparmaq istəsə də, buna nail ola bilməyib. Bundan sonra etirazçılar Xankəndinə gedən yola toplaşıb.

“Bəlkə də beynəlxalq QHT-ləri, Greta Thunbergin özünü və yaxud ekoloji problemlərlə məşğul olan “Greenpeace”in özünü, adlı-sanlı təşkilatları sponsorluqla Azərbaycana dəvət etmək mümkündür”. 

Siyasətçi Natiq Cəfərli deyir ki, Qarabağda faydalı qazıntı yataqları Rusiya və İsveçrə şirkəti tərəfindən istismar edilir. Azərbaycan hakimiyyəti bu fakta əsaslanaraq dünyada yayğın praktikanı həyata keçirir: ekoloji tələblərdən dövlət maraqları üçün istifadə edir. 

“Məqsəd hamıya aydındır. Söhbət həmin yola – Laçın yoluna nəzarətin Azərbaycan tərəfdən bərpa olunmasına, imkan daxilində rusların nəzarətində olan bölgələrdə Azərbaycan dövlət və hökumət orqanlarının hansısa bir formada iştirak etməsinin, monitorinq aparmasının qabağını açmaqdır. Bunun üçün hesablanmış addımlardır”.

“Rusiya hamıya göstərmək istəyir ki, mən burada olmasam… Bundan sonra nə olacaq? Rusiya deyəcək ki, mənim buradakı 1960 əsgərim bəs eləmir, burada 5000 əsgərə ehtiyac var. Görürsünüz, qabağını kəsmək olmur”.

AXCP-nın sədr müavini Seymur Həzi isə düşünür ki, indiki vəziyyət  Rusiya ilə razılaşdırılıb. Həmin Rusiya ki, onun üçün bu münaqişənin davamlılığı vacibdir.

“Qarabağa getmək, orada suverən hüquqlarımızı bərpa etmək istəyiriksə, bunun yolu sülhdür. Biz sülh istəsək, sülhə nail olsaq, Qarabağa gedəcəyik. Biz sülhə nail olmasaq, dünya gəlib bizim qarşımıza belə sədd çəkəcək. Çünki orada yaşayan insanlar var. Dünya bizim qarşımıza sədd çəkərək deyəcək ki, sən sülhə nail ola bilmirsənsə, ora girə bilməzsən. Mən indi soruşuram: Biz Qarabağa getmək istəyiriksə, niyə sülh prosesinin içərisində deyilik? Bu sülhü ola bilsin ermənilər pozurlar, lap yaxşı. Biz gedib oturaq diplomatik masada və bütün dünyaya nümayiş etdirək ki, bunu ermənilər pozurlar”.

Dekabrın 16-da Azərbaycan dövlət qurumları ilə Rusiya sülhməramlıları arasında keçirilən növbəti görüş də monitorinq üçün nəticə verməyib. Monitorinq qrupunun rəhbəri Məsim Məmmədov bildirilib ki, görüşdə “Qızılbulaq” qızıl, “Dəmirli” mis-molibden yataqlarına baxışın vacibliyi vurğulanıb.