Zimbabve prezidenti Robert  Muqabenin istefası ilə dünyanın ən yaşlı  dövlət başçısı adı Böyük Britaniya  kraliçası II Yelizavettaya keçib.

Afrika  ölkəsini 37 il idarə edən  93 yaşlı Robert Muqabe prezidentlik postunu təhvil verdikdən sonra bu qeyri-rəsmi adı Birləşmiş Krallığın rəhbəri 91 yaşlı II Yelizavetta alıb.

Qeyd edək ki, bu, Vindzor monarx evinin rəhbərinin növbəti rekordu olub.

Belə ki, 2015-ci ilin sentyabr ayında Britaniya rəhbərləri arasında hökumət başında olmağına görə kraliça Viktoriyanı geridə qoyub.

2016-cı ilin oktyabr ayının 13-də Tayland kralı  Pumipon  Adulyadet vəfat etdikdən sonra, o, dünyanın cari monarxları arasında ən uzun müddətli hökuməti idarə edən olub.

Cari ilin fevral ayının 6-da Yelizavetta taxtda oturmağının 65 illiyini - «sapfir» yubileyini qeyd edən ilk britaniyalı monrx kimi tarixə düşüb. 

Bundan başqa noyabrın 20-də o, həyat yoldaşı ilə – Edinburq hersoqu şahzadə Filiplə evliliyinin 70 illiyini - «platin»  yubileyini keçirib. Bundan əvvəl Britaniya taxtında oturan heç bir kraliça bu yubileyi qeyd edə bilməyib.

Qeyd edək ki, ən yaşlı hökumət başçıları siyahısında ikinci yerdə Tunisin 90 yaşlı prezidenti Beji Kaid əs-Səbsi, üçüncü yerdə isə Küveyt əmiri 88 yaşlı Sabah əl Əhməd əl Caber əs Sabah gəlir. Bundan sonra  siyahını Kuba lideri Raul Kastro (86), Kamerun prezidenti Porl Biya (84), Livan prezidenti  Mişel Aun (84), Yaponiya imperatoru  Akixito (83) və Səud kralı  Salman bin Əbül Əziz (81) davam etdirir.