Cənubi Koreyada üzərində ABŞ prezidentinin təsviri olan çoxlu sayda vərəqələr müəyyən olunub. Onların Şimali Koreyadan göndərildiyi bildirilir.

Şəkillərdə «BMT 2017» tribunasında insan cizgiləri ilə it obrazında təsvir olunan Donald Tramp ağzında bomba ilə göstərilib. Bombanın üzərində yazılıb: «Şimali Koreyanı məhv etməli»

«Şimali Koreyada 25 milyon insanı öldürəcəyik», - deyə o, bəyan edir. Həmin vaxt Yaponiyanın baş naziri Sindzo Abe və Cənubi Koreya prezidenti Mun Ceinə bənzəyən  iki kostyumlu kişi deyir: «O, tamamən dəli olub» və «Əgər o, dayanmasa, müharibə olacaq».

Trampın başından vuran və qəzəbli şimali koreyalı əsgərin təsvir olunduğu daha bir flayerdə "Səfeh qoca Trampa ölüm!» deyilir.

Başqa bir vərəqədə isə  «dinc və asayişli dünya üçün quduz it Trampın başının kəsilməsinə» çağırış var.

Ehtimal olunur ki, vərəqələr hava şarlarından atılıb. Qeyd edək ki, bu üsul Seul və Pxenyan tərəfindən propoqanda məqsədilə dəfələrlə istifadə olunub.