Oktyabrın 23-də Vətəndaş Hüquqları İnstitutunun həbsdə olan direktoru Bəşir Süleymanlının işi üzrə məhkəmənin növbəti prosesi keçirilib.
APA xəbər verir ki, Bakı Ağır Cinayətlər Məhkəməsində hakim Vüqar Seyidovun sədrliyi ilə keçirilən prosesdə dövlət ittihamçısı Vüsal Mehralıyev ittiham aktını elan edib.
İttihama aktında B.Süleymanlının ABŞ-nin “German Marşal Fondu”ndan və başqa fondlardan "sosial məzmunlu layihələr keçirmək adı ilə ayrılan ümumilikdə 148 min manatdan artıq qrantı mənimsədiyi" iddia olunub. 
"O, bu əməli törədərkən “German Marşal Fondu"nun Azərbaycan üzrə məsləhətçisi Mehriban Rəhimli və digərləri ilə cinayət əlaqəsinə girib, vəzifə səlahiyyətlərindən sui-istifadə edib və alınmış qrantlar barədə müvafiq nazirliklərə məlumat verməyib", - xəbərdə qeyd olunur. 
Bəşir Süleymanlı elan olunmuş ittiham üzrə özünü təqsirli bilməyib, işi "qurama" adlandırıb. 
Mehriban Rəhimlinin ittiham olunduğu cinayət işinin isə ayrı icraata verildiyi və hazırda ibtidai istintaqın davam etdiyi bildirilir. 
Növbəti proses noyabrın 20-nə təyin edilib. 
B.Süleymanlı bu ilin mart ayında saxlanılıb və Cinayət Məcəlləsinin 313-cü (Vəzifə saxtakarlığı), 193-1.3.2-ci (Cinayət yolu ilə əldə edilmiş pul vəsaitlərini və ya digər əmlakı leqallaşdırma, xeyli miqdarda törədildikdə) və 308.2-ci (vəzifə səlahiyyətlərindən sui-istifadə) maddələri ilə ittiham olunur. Onun barəsində Binəqədi Rayon Məhkəməsinin qərarı ilə həbs qətimkan tədbiri seçilib.
"QHT işi” üzrə həbslər bu ilin martında başlayıb. B.Süleymanlıdan başqa,  Seçki Müşahidə Alyansının icraçı direktoru Məmməd Alpay və "Hüquq və İnkişaf" İctimai Birliyinin rəhbəri Hafiz Həsənov da saxlanılıb. H.Həsənov sonradan ev dustaqlığına buraxılıb. 
Apreldə isə ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamla həbs edilib. 
İqtisadçı Qalib Bayramov və hüquq müdafiəçisi Nərgiz Muxtarova barəsində polisin nəzarəti altına vermə tədbiri seçilib.
Onlara qarşı cinayət yolu ilə əldə edilmiş əmlakı leqallaşdırma, vəzifə səlahiyyətlərindən sui-istifadə və saxtakarlıq maddələri üzrə ittiham irəli sürülüb.
İstintaqa 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri cəlb olunub.
Bundan başqa, sabiq GMF məsləhətçisi Mehriban Rəhimli və digərləri barəsində həbsə alternativ qətimkan tədbiri seçilib. Ölkə xaricində olan Sübhan Həsənli və Aytac Ağazadə isə axtarışa verilib.скачать dle 12.1