Fələstin prezidenti Mahmud Abbas Türkiyə Böyük Millət Məclisində çıxış edib.
Musavat.com xəbər verir ki, İYİ Partiya təmsilçilərinin prezidentin çıxışını Azərbaycan bayrağı ilə dinləməsi diqqət çəkib. Parlamentin Baş Assambleyasında bu gün Fələstinlə bağlı xüsusi iclas keçirilib. Prezident Mahmud Abbas parlamentin fəxri qonağı kimi deputatlara müraciət edib.
Mahmud Abbas çıxışı zamanı millət vəkilləri tərəfindən dəfələrlə alqışlanıb. Mahmud Abbas çıxışına davam edərkən qısa bir fasilə verib və Tehranda qətlə yetirilən HƏMAS Siyasi Bürosunun rəhbəri İsmayıl Haniyə üçün Fatihə oxuyub. 

M.Abbas qeyd edib ki, biz dik durmağa davam edəcəyik, torpaqlarımızı tərk etməyəcəyik. Xalqımız qəsbkarları oradan (Fələstindən) nə olursa olsun qovacaq.
O həmçinin Qəzzaya humanitar yardım etdiyinə görə Türkiyəyə dəfələrlə təşəkkür edib. 

AZƏRBAYCAN BAYRAĞI DİQQƏT ÇƏKDİ
Fələstin prezidenti Mahmud Abbas TBMM-də çıxış edərkən İYİ Partiya millət vəkillərinin qarşısında Azərbaycan bayrağının olması diqqətçəkən anlıq görüntü kimi kameralara düşüb. 
SƏBƏBİ MARAQ DOĞURDU
İYİ Partiya üzvlərinin bu münasibəti Fələstin Dövlətinin Qarabağ müharibəsində ermənipərəst mövqe tutması və Azərbaycanı dəstəkləməməsi kimi şərh edilib.
Bundan başqa, Fələstin Çin hökumətinin təzyiqi altında olan və sistemli şəkildə soyqırıma məruz qalan uyğur türklərinə qarşı susub, Çin dövlət siyasətini dəstəkləyib, uyğur türklərinə edilən zülmə məhəl qoymayıb.
 
Musavat.comскачать dle 12.1