Ukraynanın Odessa sahilləri yaxınlığında dron hücumuna məruz qalan “Atlas Bey” mülki ticarət gəmisinin azərbaycanlı kapitanı Səməd Nəsrullayevin nəşi aşkarlanaraq Odessa şəhərinə gətirilib.
Bu barədə Azərbaycan Xarici İşlər Nazirliyi (XİN) məlumat yayıb.
Nazirlik bildirib ki, müvafiq prosedurlar başa çatdırıldıqdan sonra kapitanın cənazəsi Azərbaycana göndəriləcək.
İyulun 14-də yerli vaxtla saat 15 radələrində Türkiyənin “Okean Maritime” şirkətinə məxsus “Atlas Bey” gəmisi Odessa sahilləri yaxınlığında dron hücumuna məruz qalıb.
Hücumdan sonra kapitan istisna olmaqla, gəminin digər ekipaj üzvləri təxliyə edilərək Odessa şəhərində sahilə çıxarılıblar. Dənizçilərin İctimai Birliyinin sədri İlham Nəsirov daha sonra kapitan Səməd Nəsrullayevin həlak olduğunu açıqlayıb.
Azərbaycan XİN-in məlumatına görə, gəminin ekipaj üzvlərindən 11-i Azərbaycan vətəndaşı olub.
Gəminin ikinci kapitanı İsmayıl Axundov hadisədən sonra “Azərtac”a bildirib ki, yük boşaldıldıqdan sonra gəmi Odessa sahillərindən Türkiyə istiqamətində hərəkət edib.
“Gəminin azərbaycanlı heyətinin 11 üzvü göyərtəyə düşmüşdük, gəmini yuyurduq. Yuxarıda yalnız kapitan qalmışdı. Bu zaman güclü partlayış baş verdi, sonra yanğın başladı. Yaxınlıqda olan gəmilər köməyə gəldi və təxliyə başladı”, - Axundov deyib.
Hadisədən sonra Azərbaycan XİN vətəndaşlara hərbi əməliyyatların davam etdiyi və təhlükəsizlik vəziyyətinin qeyri-sabit olduğu bölgələrə səfər etməkdən, həmin ərazilərdə işləməkdən, eləcə də bu marşrutlar üzrə hərəkət edən nəqliyyat vasitələrində, o cümlədən dəniz gəmilərində əmək fəaliyyəti ilə məşğul olmaqdan çəkinməyə çağırıb.
Bundan əvvəl iyunun 5-də də heyətində ümumilikdə 25 nəfər Azərbaycan vətəndaşının olduğu iki xarici yük gəmisinə Azov dənizində dron hücumları həyata keçirilmişdi. XİN hücum nəticəsində ümumilikdə 5 nəfər Azərbaycan vətəndaşının həlak olduğu, 3 nəfərin isə yaralandığı barədə məlumat yaymışdı.скачать dle 12.1