Azərbaycanda yaşayan Adıgözəlov Fidail Xalik oğlu qardaşı Adıgözəlov Dilqəm Xalik oğlunun Avropada həyata keçirdiyi siyasi fəaliyyətə görə polis tərəfindən təzyiqlərə məruz qaldığını bildirir.
Fidail Adıgözəlovun sözlərinə görə, hadisə 13 iyul 2026-cı il tarixində, saat 10:00 radələrində Mingəçevir şəhəri, 1-ci Günəş döngəsi, ev 25 ünvanında baş verib. O iddia edir ki, polis əməkdaşları məhkəmə qərarı və qanuni əsas olmadan yaşadığı evə daxil olublar.
Onun sözlərinə görə, polis əməkdaşları qardaşı Dilqəm Adıgözəlovun Avropada keçirilən etiraz aksiyalarında iştirakına dair görüntüləri izlədiklərini bildirərək həmin videoları ona da göstəriblər.
Fidail Adıgözəlov iddia edir ki, polis əməkdaşları ondan qardaşının hansı ölkədə və hansı şəhərdə yaşadığını bildiklərini söyləyərək, Dilqəm Adıgözəlovun siyasi fəaliyyətini dayandırmasını və onun Azərbaycana qaytarılmasına nail olmasını tələb ediblər. O bildirir ki, bu tələblərin yerinə yetirilməyəcəyi təqdirdə özü və ailə üzvləri hədələniblər.
Fidail Adıgözəlovun sözlərinə görə, daha sonra o, qanunsuz şəkildə Mingəçevir Şəhər Polis İdarəsinə aparılıb və təxminən 24 saat orada saxlanılıb. O iddia edir ki, saxlanıldığı müddətdə psixoloji və fiziki təzyiqlərə məruz qalıb.
Adıgözəlov həmçinin bildirir ki, evə edilən basqın zamanı ailə üzvlərindən biri baş verənləri gizli şəkildə videoya çəkə bilib. Onun sözlərinə görə, həmin videogörüntülər hazırda onların əlindədir və polis əməkdaşlarının qanunsuz hərəkətlərini təsdiqləyən sübut kimi saxlanılır.
Fidail Adıgözəlov hadisənin ictimailəşdirilməsini, məsələ ilə bağlı müstəqil araşdırma aparılmasını və hüquqi qiymət verilməsini tələb etdiyini bildirib.
скачать dle 12.1