İsraildən Suriyaya sərt xəbərdarlıq – “Çox ağır bədəl ödəyərsiniz”

İsrailin müdafiə naziri Yisrael Kats Suriyaya qarşı kəskin açıqlama verib. Nazir bildirib ki, İsrailin təhlükəsizliyini təhdid edən qüvvələrin Suriyaya yerləşdirilməsinə heç bir halda dözülməyəcək.
Kats konkret olaraq Suriya prezidenti Əbu Məhəmməd əl-Colaniyə – Əhməd əş-Şaraa – səslənərək belə deyib:
“Colaniyə xəbərdarlıq edirəm: əgər düşmən qüvvələrin Suriyaya daxil olmasına və İsrailin təhlükəsizlik maraqlarını təhdid etməsinə icazə versəniz, çox ağır bir bədəl ödəyəcəksiniz.”
Müşahidəçilər bu açıqlamanı yeni bir hərbi əməliyyatın xəbərçisi kimi dəyərləndirirlər. Xüsusilə prezident statusu daşıyan bir şəxsə, özü də keçmiş cihadçı imici ilə tanınan liderə qarşı bu qədər sərt və birbaşa ritorika diplomatik təcrübədə nadir hallarda rast gəlinir. Əhməd əş-Şaraa bu gün artıq Suriya dövlətinin başında olsa da, İsrail onun keçmişini unutmur və onu hələ də potensial təhlükə kimi qiymətləndirir.

Əbu Məhəmməd əl-Colani, ya da indiki adı ilə Əhməd əş-Şaraa kimdir?

Əbu Məhəmməd əl-Colani (əsl adı: Əhməd Hüseyn əş-Şaraa) Suriyanın yeni prezidentidir. O, əvvəllər Suriyada fəaliyyət göstərən radikal silahlı qruplaşma – “Ən-Nusra Cəbhəsi”nin, daha sonra isə onun varisi olan “Heyət Təhrir əş-Şam”ın (HTƏŞ) lideri kimi tanınıb.
Colani uzun illər “Əl-Qaidə” ilə ideoloji və təşkilati əlaqələrə malik olub. Lakin 2017-ci ildə rəhbərlik etdiyi təşkilatı rəsmi olaraq “Əl-Qaidə”dən ayıraraq, “Heyət Təhrir əş-Şam” adlandırdı və özünü daha praqmatik, yerli legitim güc mərkəzi kimi təqdim etməyə başladı. Onun rəhbərliyi altında HTƏŞ Suriyanın şimal-qərbində, xüsusilə İdlib vilayətində, de-fakto idarəetmə qurdu.
Bu mərhələdə Colani siyasi ambisiyalarını gizlətmədi. Qərb jurnalistlərinə müsahibələr verərək özünü “mülayimləşmiş”, “təhlükəsizliyi və sabitliyi təmin etmək istəyən” lider kimi təqdim etdi. Bu imic çalışmaları fonunda, Suriyada mövcud rejimin iflası və beynəlxalq güclərin mövqelərinin dəyişməsi nəticəsində Colani 2024-cü ildə ölkəsinin rəsmi lideri oldu.
Buna baxmayaraq, regionda bir çox dövlətlər, xüsusilə İsrail və ABŞ, onu hələ də onun radikal keçmişi baxımından etibarsız və təhlükəli fiqur kimi qiymətləndirirlər. İsrailin müdafiə nazirinin son açıqlaması da mümkündür ki, məhz bu yanaşmanın ifadəsidir.скачать dle 12.1