10 beynəlxalq insan haqları təşkilatından ibarət koalisiya Beynəlxalq Hakimlər Assosiasiyasının (BHA) 11-17 oktyabr tarixlərində Bakıda keçiriləcək illik toplantısı ərəfəsində assosiasiyaya məktub ünvanlayıb. 
Təşkilatlar assosiasiyanı Azərbaycanda "məhkəmə sisteminin müstəqil olmaması və davam edən repressiyalarla bağlı ciddi qətnamə" qəbul etməyə çağırıblar. 
Məktuba imza atan təşkilatlar "Azərbaycanda Repressiyalara Son Kampaniyası", Avropa İnsan Hüquqları Müdafiəsi Mərkəzi, Demokratik Seçkilər üçün Avropa Platforması, Avropa Mübadiləsi, "Freedom Now", Müstəqil Vəkillər Şəbəkəsi, Norveç Helsinki Komitəsi, Açıq Azərbaycan Təşəbbüsü, "People in Need" və Beynəlxalq Hüquqşünaslar Komissiyasıdır. 
Məktuba imza atan təşkilatlar vurğulayırlar ki, Azərbaycanın məhkəmə sistemi icraedici hakimiyyətin "ciddi təsiri altında" fəaliyyət göstərir və bu da siyasi motivli cinayət təqiblərinə və müxalifətə qarşı genişmiqyaslı təzyiqlərə şərait yaradır. Onların xəbərdarlığına görə, bu cür "müstəqillik çatışmazlığı insan haqlarını və qanunun aliliyini birbaşa şəkildə sarsıdır".
"Bu çağırış mühüm bir məqamda edilir: BHA Bakıda keçiriləcək toplantıya hazırlaşarkən həm birbaşa dialoq imkanı, həm də Azərbaycanın ədalət sistemi ilə bağlı reallığı dəyərləndirmək məsuliyyəti ilə üz-üzədir.
BMT və Avropa Şurası qurumlarının, eləcə də yerli vətəndaş cəmiyyəti təşkilatlarının hesabatları davamlı şəkildə məhkəmə təqiblərini, işgəncələri, siyasi motivli ittihamları və ədalətli məhkəmə təminatının sistemli şəkildə pozulmasını sənədləşdirir. Azərbaycan insan haqları təşkilatlarının məlumatına görə, bu il ölkədə siyasi məhbusların sayı 375-ə çatıb və son aylarda onlarla yeni şəxs hədəfə alınıb. Avropa İnsan Hüquqları Məhkəməsi dəfələrlə müəyyən edib ki, Azərbaycan məhkəmələri əsassız həbslərə qarşı müdafiə təmin etmir və çox vaxt ittiham tərəfinin iradəsini təsdiqləmək üçün sadəcə “möhür” funksiyası daşıyır", - deyə çağırışda bildirilir. 
Təşkilatlar məktubda BHA-nın bir sıra addımları atmasına çağırış edir. Bu addımlara yerli məhkəmələrə icraedici hakimiyyətin müdaxiləsini qınamaq, məhkəmə orqanlarının repressiv qanunları bacarığının olmamasını pisləmək, 
Azərbaycanı beynəlxalq monitorinq qurumları ilə əməkdaşlıq etməyə və Avropa İnsan Haqları Məhkəməsinin qərarlarını tam şəkildə icra etməyə çağırmaq, Azərbaycanın pozuntularını rəsmi şəkildə araşdırmaq üçün BHA-nın daxili monitorinq mexanizmlərini işə salmaq daxildir. 
Təşkilatlar bildirirlər ki, BHA tərəfindən qəbul ediləcək qətnamə "ədalətsiz şəkildə həbs olunanlara həmrəylik siqnalı" göndərər və Azərbaycanda "hüquq peşəsinin müstəqilliyinə dəstək üçün mühüm addım" olar.скачать dle 12.1