Azərbaycan vətəndaşları axtarışa verilib, ittihamlar hələ təsdiqlənməyib

11 sentyabr 2022-ci il tarixində saat 19:00 radələrində, İstanbulun Sarıyer rayonunda yerləşən “Vadi İstanbul” Ticarət Mərkəzindəki kafelərdən birində iki qrup arasında silahlı insident baş verib. Hadisə zamanı atəş açılması nəticəsində yaralanan şəxslərin olduğu bildirilir.

İlkin məlumatlara görə, insidentdə Azərbaycan vətəndaşları da iştirak edib. Hadisədən sonra Türkiyə polisi əməliyyat keçirərək insidentdə iştirak etdiyi ehtimal edilən bir neçə nəfəri saxlayıb. Digər şəxslər isə hadisə yerindən qaçaraq gizləniblər.
Türkiyə hüquq-mühafizə orqanlarının Azərbaycan tərəfinə verdiyi məlumata əsasən, qaçan şəxslər arasında Azərbaycan vətəndaşları, Murad Muradov, Babək Novruzov, Amil Məmmədov, Şəhriyar Hüseynov, Qoca Aslanovun da, adı çəkilir.

Bununla əlaqədar Azərbaycan Respublikasının Baş Prokurorluğunda araşdırmalara başlanılıb.
Hazırda, Murad Muradov, Babək Novruzov, Amil Məmmədov, Şəhriyar Hüseynov və Qoca Aslanov Azərbaycan Respublikası Baş Prokurorluğunun qərarı ilə axtarışa verilib. Lakin rəsmi qurumlar bildirir ki, onların insidentdə birbaşa iştirakı və ya cinayət törətməsi faktı hələ tam şəkildə sübuta yetirilməyib. Araşdırma istintaq mərhələsindədir və yekun hüquqi qiymət yalnız məhkəmə qərarından sonra verilə bilər.

Qeyd edək ki, mövcud qanunvericiliyə əsasən, şəxs barəsində məhkəmə hökmü çıxarılana qədər o, təqsirsiz hesab olunur. Hadisə ilə bağlı istintaq tədbirləri həm Türkiyə, həm də Azərbaycan hüquq-mühafizə orqanları tərəfindən davam etdirilir.
скачать dle 12.1