Azərbaycanda siyasi fəal kimi tanınan Mirzəyev Dadaş Kazım oğlu ilə bağlı yeni iddialar gündəmə gəlib. Məlumatlara görə, onun ölkəni tərk etməsindən sonra hüquq-mühafizə orqanları tərəfindən ailə üzvlərinə qarşı təzyiq göstərildiyi iddia olunur.Bildirilir ki, siyasi fəaliyyəti səbəbindən təzyiqlərlə üzləşdiyini deyən Mirzəyev Dadas bir müddət əvvəl Azərbaycanı tərk edib. Bundan sonra isə onun ailə üzvlərinin müxtəlif təzyiqlərlə qarşılaşdığı barədə məlumatlar yayılıb.
İddialara əsasən, 2025-cı il 13 noyabr tarixində polis əməkdaşları Binəqədi rayonu, Biləcəri qəsəbəsində yerləşən Mirzəyevlərin yaşadığı ünvana gəlib. Məlumata görə, polis əməkdaşları məhkəmə qərarı təqdim etmədən mənzilə daxil olaraq orada axtarış aparıblar.
Hadisədən sonra fəalın atası Mirzəyev Kazım Binəqədi Rayon Polis İdarəsinə aparılıb. Bildirilir ki, polis idarəsində ondan oğlunun harada olması ilə bağlı məlumat almaq məqsədilə sorğu-sual edilib. Eyni zamanda hüquq-mühafizə orqanlarının Mirzəyev Dadaş Kazım oğlu barəsində axtarış elan edildiyini bildirdikləri iddia olunur.
Ailə üzvlərinin sözlərinə görə, polis idarəsində Mirzəyev Kazım oğluna telefonla zəng etməyə məcbur edilib. O isə oğlunun harada olduğu barədə məlumatı olmadığını və onunla əlaqəsinin olmadığını bildirib.
İddialara görə, Mirzəyev Kazım polis idarəsində qanuni əsas olmadan təxminən bir gün saxlanılıb. Bu müddət ərzində ona normal şərait yaradılmadığı, hətta ac və susuz saxlanıldığı qeyd olunur. Daha sonra isə o, şərti şəkildə sərbəst buraxılıb.
Hadisə ilə bağlı rəsmi qurumlar tərəfindən hələlik hər hansı açıqlama verilməyib.
Hüquq müdafiəçiləri bildirirlər ki, qüvvədə olan qanunvericiliyə əsasən məhkəmə qərarı olmadan yaşayış sahəsində axtarış aparılması və şəxsin yaxınlarına təzyiq göstərilməsi ciddi hüquq pozuntusu kimi qiymətləndirilə bilər. Onların fikrincə, bu cür iddiaların müvafiq qaydada araşdırılması vacibdir.
İnsan hüquqları sahəsində fəaliyyət göstərən ekspertlər də hesab edirlər ki, siyasi fəalların ailə üzvlərinə qarşı təzyiq iddiaları cəmiyyət üçün həssas məsələdir və belə hallara hüquqi qiymət verilməsi zəruridir.

ICxeber.infoскачать dle 12.1