Hüquqşünas Əkrəm Həsənov Mərkəzi Bankın fəaliyyətinin iflic vəziyyətə düşdüyünü deyir. Bu barədə feysbuk səhifəsində yazan Ə.Həsənov qeyd edir ki, MB İdarə Heyətinin 7 üzvündən hazırda yalnız 2-i mövcuddur. Qanuna görə isə MB İH üzvlərinin yarıdan çoxu iştirak etdikdə səlahiyyətlidir.

“2 gün əvvəl Mərkəzi Bankın 5 üzvündən üçünün səlahiyyət müddəti bitib. Məlum olduğu kimi, qanuna əsasən Mərkəzi Bankın 7 üzvü olmalıdır: 5-i daimi əsaslarla işləyən və 2 kənar üzv (xarici təcrübədə adətən biri maliyyə nazirliyinin, digəri isə ictimaiyyətin nümayəndəsi olur). Lakin kənar üzv vəzifələri həmişə vakant olub. Çünki Elman Rüstəmov kənardan işinə nəzarət edilməsini istəmədiyindən həmin üzvlərin təyinatının reallaşmasına imkan verməyib. Buna görə də Mərkəzi Bankda həmişə 5 daimi əsaslarla işləyən üzv olub.

Qanuna görə İdarə Heyəti üzvlərinin yarıdan çoxu iştirak etdikdə səlahiyyətlidir. Hazırda isə 7 üzvdən cəmi 2-si mövcuddur. Buna görə də Mərkəzi Bank heç bir strateji qərar qəbul etmək səlahiyyətinə malik deyil. Bir sözlə, iflic olub”, – deyə hüquqşünas bildirir.