Birləşmiş Ştatlar və Rusiya diplomatik cəbhədə əlaqələri düzəltməyə çalışır. Kremlin aparıcı müşaviri Kiril Dmitriyev Ukrayna ilə bağlı danışıqları irəli aparmaq üçün hazırda Vaşinqtondadır. 2022-ci ildə Moskvanın Ukraynaya qarşı tammiqyaslı işğalı başlayandan ilk dəfədir Rusiyanın yüksəkvəzifəli rəsmisi ABŞ paytaxtına gedib.
AzadlıqRadiosunun Rusiya və "Current Time" layihəsi üzrə regional direktoru Natan Hoc sürətlə dəyişən durumun Moskvada fərqli reaksiyalar yaratdığını yazır. Prezident Donald Trampın Ukrayna sülh danışıqlarında irəliləyişlə bağlı aşkar məyusluğu artıq üzə çıxıb və ABŞ lideri rusiyalı həmkarına qarşı ritorikanı kəskin dəyişib.
Tramp martın 30-da "NBC News"dan Kristen Uelkerə zəng edərək Rusiya prezidenti Vladimir Putinə çox qəzəbləndiyini deyib, səbəb kimi isə onun Ukrayna prezidenti Volodimir Zelenskiyə etimadı şübhə altına almasını göstərib. Sonradan Ağ evin sözçüsü Trampın müharibənin hər iki tərəfindəki liderlə bağlı məyus olduğunu desə də, ABŞ prezidentinin sözləri onun ritorikasında böyük dəyişikliyi üzə çıxarıb.
Tramp adətən Putinlə bağlı xoş tonlarla danışıb, əsas qəzəbini Ukrayna prezidentinə yönəldib, ona "diktator" deyib, Oval kabinetdə açıq şəkildə danlayıb.

"Vesti"nin yozumu

Martın 31-də "Rossiya-1" dövlət televiziyasının "Vesti" xəbər proqramında "NBC News"un Trampın sözlərini yaymaqla gizli siyasi gündəm yürütdüyü iddia edilib.
"Ukraynaya təzyiqi balanslaşdırmaq üçün Zelenskiyə rəğbəti ilə seçilən "NBC News" Trampdan onun Putinə qarşı iddia olunan qəzəbiylə bağlı sitat qopara bilib", – aparıcı deyib.
Teleaparıcı Yevgeni Popov onu da iddia edib ki, Tramp, sadəcə, bir jurnalistin salındığı "Signal" qrupunda administrasiyasının müharibə planlarını paylaşılmasına ölkəiçi diqqəti yayındırmağa çalışıb.
"Ağ evin sakini "Signal" qrupunda husilərə hava zərbələri barədə informasiyanın sızmasıyla bağlı qalmaqalı yatırtmağa çalışır", – o söyləyib.
Amma Zelenski ilə Oval kabinetdəki qızğın mübahisədən sonra Rusiya dövlət televiziyası bunu bayram edirdi. Müəllif yazır ki, Tramp Rusiya vədlərinə əməl etməyəcəyi halda, daha sərt mövqe tutmaq vədi vermişdi. Bu isə ABŞ ilə böyük yaxınlaşmaya bəslənən ümidləri azalda bilər.
Rusiya dövlət mediasına baxıb ABŞ-Rusiya münasibətlərinin perspektivini dəyərləndirmək elə də yaxşı yol deyil. Bu media Putinin nə düşündüyünə etibarlı barometr sayılsa da, qapalı qərarvermə aparatının başında şəxsən Putin özü əyləşir.

Avropaya qarşı sarkazm

Rusiya dövlət televiziyasında Avropaya yönəlik sarkazm isə daha çox şey deyir.
ABŞ və Rusiya Qara dənizdə hərbi gücdən istifadəni dayandırmaq üzrə razılaşma əldə edəndən sonra teleaparıcı Vladimir Solovyov deyib ki, "allahsız" avropalılar Ər-Riyad danışıqlarında yer almayıblar.
"Tramp üçün Putin tamamilə anlaşılandır: onun fundamental və təməl dəyərlərinə yaxın bir ölkənin lideridir. Onun qarşısına çıxan kimdir?", - Solovyov sual edib.
"Tramp üçün Avropa düşməndir", – o əlavə edib.
Rusiya propaqandası Avropanı bir təhdid kimi görərək ona qarşı yönəlib, xüsusilə də sonuncu Ukraynaya dəstək üçün koalisiya yaratmaq, yaxud sülhməramlılar göndərməyi götür-qoy etdiyi bir vaxtda.
"Moskvada şampan açmaq" – bu, ABŞ-nin Putinin xeyrinə görünən siyasi qərarları üçün populyar qısa ifadəsidir.
2016-cı ildə Tramp seçkidə qalib gələndə rusiyalı ultramillətçi Vladimir Jirinovski badələrə "Abrau-Durso" şərabı süzmüşdü. Bayaqkı ifadə şüuraltı həmin anı xatırladır.
Ancaq indilik görünən odur ki, Rusiya dövlət televiziyası Vaşinqtondan gələn ziddiyyətli siqnalları izah etməyə rakurs tapmır.скачать dle 12.1