Baş nazir Beynəlxalq Ədalət Məhkəməsinin qərarının icra olunmadığını deyir

Ermənistanın Baş naziri Nikol Paşinyan aprelin 4-də tanınmayan Dağlıq Qarabağ Respublikasının 30 nəfərə yaxın vətəndaşını Laçın dəhlizində beş saat saxlanılmasını “açıq-aşkar insident” adlandırıb.

“Daha bir dəhşətli hadisə Dağlıq Qarabağın bir qrup sakininin Gorusdan Stepanakertə (Xankəndi) gedərkən yenidən öz evlərinə qayıtmasına icazə verilməməsi ilə baş verib”, – deyə Baş nazir hökumətin 6 aprel iclasında bildirib.

Aprelin 4-də axşam Rusiya sülhməramlılarının Laçın yoluyla Gorusdan apardığı 27 erməni Xankəndinə buraxılmayıb.

Bu zaman halı pisləşən qadınlara ilkin tibbi yardımı azərbaycanlı həkimlər göstərib.

Onlara Şuşada tibb məntəqəsinə yerləşmək təklif edilsə də, imtina ediblər.

Ona görə də qadınları TƏBİB-in (Tibbi Ərazi Bölmələrini İdarəetmə Birliyinin) iki təcili yardım maşını ilə Xankəndi xəstəxanasına aparıblar.

N.Paşinyan çıxışında Beynəlxalq Ədalət Məhkəməsinin Laçın dəhlizinin açılması ilə bağlı qərarının icra olunmadığını bir daha xatırladıb.

Yeni Laçın yolunun istifadəyə verilməsindən sonra Azərbaycan Silahlı Qüvvələrinin bir sıra yüksəklikləri nəzarətə götürməsində gəlincə, Baş nazir deyib ki, ermənilərin mövqelərində heç bir dəyişiklik yoxdur, sadəcə, Ermənistan-Dağlıq Qarabağ marşrutunda dəyişiklik olub:

“Bizim qiymətləndirməmizə görə, bəzi yerlərdə Azərbaycan tərəfi sərhəddən 100-300 metr aralıda Ermənistan ərazisində məskunlaşıb və mühəndis işləri aparıb. Bundan sonra hər iki tərəfin kartoqraflarının vəziyyəti düzəltməsi qərara alındı. Sərhədçilərin dislokasiya yerlərinin tənzimlənməsi işləri aparıldı və vəziyyət bir qədər yaxşılaşdı. O cümlədən, 12 km-dən 7-də dislokasiya məntəqələri dəqiqləşdirilib, 5 km-də işlər davam etdirilir”.

Aprelin 1-də Ermənistan-Azərbaycan sərhədində iki ölkənin nümayəndələri görüşüb.

Ermənistan Milli Təhlükəsizlik Xidmətinin məlumatına görə, tərəflər sərhədin dəqiqləşdirilməsi üzrə işlər aparıb və nəticədə bu sahədə vəziyyət xeyli yaxşılaşıb.

Ancaq Azərbaycan tərəfi bu günə qədər görüş barədə rəsmi məlumat verməyib.

2020-ci ilin sentyabrında Azərbaycan və Ermənistan silahlı qüvvələri arasında qarşıdurma başlayıb.

Ümumilikdə 44 gün sürən və İkinci Qarabağ müharibəsi adlandırılan münaqişədə hər iki tərəfdən 6 mindən artıq hərbçi həlak olub.

Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.

Həmin ilin 10 noyabr bəyanatına (Azərbaycan, Ermənistan və Rusiya arasında imzalanıb) əsasən, döyüşlər dayandırılıb.

Bundan sonra Laçın dəhlizində və Qarabağda Rusiya sülhməramlıları yerləşdirilib.

İkinci Qarabağ müharibəsindən öncə, 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilib.

Münaqişə SSRİ dönəmindən Ermənistanın Azərbaycana qarşı ərazi iddiaları ilə başlayıb.

Meydan TV