Yerli media bazar ertəsi bildirib ki, İran hakimiyyəti 22 yaşlı Məhsa Əmininin polis nəzarətində olarkən öldürülməsi ilə bağlı aylardır davam edən etirazlar fonundason iki gündə üç qadın jurnalisti həbs edib.

İranda qadınların geyim qaydalarını pozduğu iddiası ilə əxlaq polisi tərəfindən həbs edilən İran kürdü Əmininin sentyabrın 16-da ölümündən sonra etirazlar davam edir.

Səlahiyyətlilər deyirlər ki, İslam respublikasının "düşmənləri" tərəfindən qızışdırılan "iğtişaşlar" zamanı yüzlərlə adam, o cümlədən təhlükəsizlik qüvvələrinin üzvləri həlak olub, minlərlə insan həbs edilib.

"Son 48 saat ərzində ən azı üç qadın jurnalist, yəni Melika Haşimi, Saideh Şafiyi və Mehrnuş Zareyi Tehranda həbs edilib", islahatçı "Etemad" qəzeti Tehranın jurnalistlər birliyinə istinadən yazır.

Qəzet üç qadının etirazlarla bağlı həbs olunanların çoxunun saxlandığı Evin həbsxanasına köçürüldüyünü bildirib.

Dörd ay əvvəl ölkədə iğtişaşlar başlayandan bəri 80-ə yaxın jurnalistin həbs edildiyi təxmin edilir.

Son həbslərin səbəbləri barədə ətraflı məlumat verilməyib.

Şafeyi müstəqil jurnalist və yazardır. Zareyi isə müxtəlif islahatçı nəşrlər üçün yazır.

Yerli mediaya görə, Haşimi "Şəhr" adlı bir nəşriyyatda işləyir.

Oktyabrın sonlarında 300-dən çox iranlı jurnalist hökuməti "həmkarlarını həbs etmək və onların vətəndaş hüquqlarından məhrum etmək"lə bağlı tənqidi bəyanat imzalayıb.

Jurnalistlərin Müdafiəsi Komitəsinin (CPJ) bildirdiyinə görə, həbsxanada olanlar (bəziləri üç aydan çox) uzun müddət təkadamlıq kameralarda saxlanılır. Digərləri tibbi xidmətə, duşa və ya vanna otağına çox az çıxışı olan izdihamlı kameralardadır. 100 qadın üç tualeti paylaşmağa məcbur olub. CPJ, həmçinin zehni təzyiq altında olanlara tərkibində yüksək dozada morfin olan trankvilizatorların verildiyi barədə xəbərlər eşirdiyini bildirib.

Komitə bildirir ki, məhkəməyə göndərilən jurnalistlər öz vəkillərini seçə bilmir və ya bəzi hallarda onlar vəkil hüququndan məhrum edilir. Cəmi beş-yeddi dəqiqə davam edən qapalı məhkəmələrdən sonra bir neçə nəfərə son dərəcə ağır hökmlər verilir.

amerikaninsesi.org