Dəniz Baykal: "Bu Konstitusiya Türkiyəyə diktatura gətirəcək"

Tarix:13-01-2017, 11:04 Baxış Sayı:227

Türkiyədə keçirilən Konstitusiya müzakirələri gərginliklərlə yadda qalır. Srağagün keçirilən iclasda əlbəyaxa olan millət vəkilləri dünən də CHP-nin Antalyadan seçilən millət vəkili Dəniz Baykalın sərt çıxışını izləyiblər. Dəniz Baykal konstitusiya dəyişiklik təklifinin "Türkiyənin əsrlik mədəniyyət seçimini dəyişdirməyə yönəlik" olduğunu söyləyib.

Baykal Türkiyə Böyük Millət Məclisinin Baş Məclisində konstitusiya dəyişiklik təklifinin prezidentliyə namizəd və seçkini təşkil edən yeddinci maddəsinin müzakirələrində söz alıb.

Dəniz Baykal sözügedən maddənin seçiləcək prezidentin eyni zamanda partiyası ilə əlaqəsini davam etdirməsini mümkün etdiyini deyib.

"Əlbəttə, hər kəsin bir siyasi üstünlüyü var. Burada məsələ rəsmi məqamda olan şəxsin siyasi partiyanı təmsil etmək kimliyi ilə eyni anda prezident vəzifəsində işləməsidir. Bu qüvvələr ayrılığına, prezidentin mövqeyinə, siyasi partiyalar arasındakı münasibətlərə ciddi təsir göstərir. Əslində bu, siyasi partiya sədrinin Milli Təhlükəsizlik Şurasına daxil olması deməkdir. Dövlətin bütün əsas təşkilatlarına siyasi partiya sədri olaraq girəcək, milyardlarla büdcəni birbaşa xərcləyəcək, büdcəni o formalaşdıracaqdır", - deyə bildirib.

Prezidentə verilən imtiyazların demokratik siyasəti, rəqabəti ciddi dərəcədə zəiflədəcəyini söyləyən Baykal deyib:

"Beləcə, dövləti yalnız bir partiyanın əli ilə tükəndirmiş olmursunuz, bir siyasi partiyanı da dövlətin partiyası halına çevirirsiniz. Bu çox təhlükəlidir. Bu, suverenliyin çatlaması mənasına gəlir. Bu, dövləti siyasi partiyanın əli ilə tükəndirmək deməkdir. Görünən odur ki, təkpartiyalı dövlət istəyirsiniz. Partiya millət deyil, millətin bir hissəsidir. Millət suverenliyin sahibidir. Partiya o suverenliyin sahibi deyil. Partiyan suverenlik deyil, hegemoniyadır."

Konstitusiyaların bir mədəniyyət seçimi olduğunu vurğulayan Baykal, "Bu konstitusiya paketi Türkiyənin əsrlik mədəniyyət seçimini dəyişməyə yönəlib. Bu paket Yaxın Şərqdəki diktatorluq rejimini Türkiyəyə gətirməyin bütün hüquqi, konstitusion bazasına malikdir", - deyə bildirib.

ŞƏRH YAZ