Qazaxıstanın paytaxtı Astana şəhərində yanvarın 23-də başlayan Suriya məsələsi üzrə danışıqlar zamanı müxaliflər yeni açıqlama ilə çıxış ediblər. Belə ki, Suriya müxalifətinin danışıqlarında iştirak edən nümayəndələri Rusiya, İran və Türkiyənin hazırladığı yekun kommunikeni imzalamaqdan imtina etdiklərini açıqlayıblar.

Qeyd edək ki, 15 silahlı qruplaşmadan ibarət Suriya müxalifəti atəşkəs barədə razılaşmanı dəstəkləsə də, heç bir sənədə imza atmayıblar.

"Anadolu" xəbər agentliyinin məlumata görə, Suriyada qarşıdurmaların dayandırılması və atəşkəsin əldə olunması məqsədilə Türkiyə, Rusiya və İran arasında razılıq əldə olunub. Razılaşma üç ölkənin birgə mexanizm quraraq atəşkəs monitorinqini aparmaq və həyata keçirilməsini təmin etməkdən ibarətdir.

AFP-nin xəbərinə görə, Astana danışıqlarında iştirak edən BMT-nin Suriya üzrə xüsusi nümayəndəsi Steffan de Mistura bildirib ki, Suriya mövzusunda yekun bəyannamənin qəbul olunmasına az qalıb: "Çox gərgin müzakirələr gedir. Çünki bu sadəcə bir sənəd deyil. Düşmənçiliyin kənara qoyulması ilə bağlıdır."
 
Astana danışıqlarında iştirak edən müxalif qruplardan birinin sözçüsü Üsamə Əbu Zeyd bildirib ki, Rusiya ilə atəşkəs mövzusunda razılığa gəliblər: "Rusiyadan atəşkəs məsələsində addım atacaqlarına dair öhdəlik almışıq. Biz yalnız sözlər deyil, əməldə də bunu gözləyirik. Bu dəqiqəyə qədər yekun bəyannamə layihə üzərində müzakirələr edilir".