Trampa etiraz etdiyi üçün Baş prokuror vəzifəsindən kənarlaşdırılıb

Tarix:31-01-2017, 09:57 Baxış Sayı:111

ABŞ prezidenti Donald Tramp dünən axşam ABŞ Baş prokuroru və ədliyyə naziri Salli Yeytsi vəzifəsindən uzaqlaşdırıb. Buna səbəb Salli Yeytsin verdiyi son bəyanat olub. Trampın qərarlarının qanuniliyini şübhə altına alan Salli Yeyts bildirib ki, Ədliyyə nazirliyi prezidentin miqrasiya ilə bağlı son fərmanlarını məhkəmədə müdafiə etməyəcək.

Bu barədə Ağ Evin Mətbuat Xidmətinin yaydığı bəyanatda bildirilir.

«Baş prokurorluq vəzifəsini icra edən Salli Yets ABŞ vətəndaşlarını qorumaq üçün verilən əmri yerinə yetirməkdən imtina etməklə Ədliyyə Nazirliyinə xəyanət edib», - deyə mətndə bildirilir.

Yeytsin yerinə Virciniyanın Şərq əyalətinin federal prokuroru Dana Boente təyin edib. Donald Tramp ABŞ Baş prokuroru vəzifəsinə Ceff Seşnsın namizədliyini irəli sürüb. Yeytsin fərmanı Seşns ədliyyə naziri kimi Senatda dəstəklənənə kimi qüvvədədir.

Xatırladaq ki, ötən həftə Donald Tramp miqrasiya siyasətini sərtləşdirən bir sıra fərmanlar imzalayıb. O, Dövlət Departamenti və Milli Təhlükəsizlik Nazirliyinə ABŞ ərazisinə 120 gün ərzində qaçqınların gəlişinin dayandırılması barədə göstəriş verib. Dövlət başçısı həmçinin Birləşmiş Ştatlar tərəfindən qaçqın qəbulu kvotasını azaldıb: 2017-ci maliyyə ili (2016—cxı ilin oktyabrından başlayıb) Amerika tərəfi 50 mindən artıq adamı qəbul etməyəcək. Bundan başqa D.Tramp İraq, İran, Suriya, Sudan, Yəmən. Liviya və Somali vətəndaşlarının 90 gün ərzində ABŞ-a daxil olmasının qadağan edilməsi barədə fərman imzalayıb.

Bununla əlaqədar 16 ştatın baş prokuroru ABŞ prezidenti Trampın miqrasiya siyasətinə qarşı birgə bəyanat yayaraq dövlət başçısının fərmanlarını qeyri-qanuni adlandırıb, ölkənin milli maraqlarına zidd olduğunu bildiriblər.

Vaşinqton ştatının baş prokuroru Bob Ferqüson prezident Donald Trampın qaçqınların qəbulunun dayandırılması və müsəlman ölkələrinin vətəndaşlarının ölkəyə girişinə qadağan olunmasına dair fərmanları ilə bağlı iddia qaldıracaq. O, Trampa qarşı iddia qaldıran ilk baş prokuror olacaq.

Bundan başqa, Vaşinqtonda ABŞ prezidenti Donald Trampın miqrasiya siyasətinə qarşı etiraz aksiyası keçirilib. Aksiya iştirakçıları Trampın miqrasiya ilə bağlı son fərmanlarının qəbuledilməz olduğunu bildiriblər.