Belçikdan bir qrup parlamentari Suriyaya səfər edib. Hələb, Hmeymim və paytaxt Dəməşqdə olan belçikalı deputatlar prezident Bəşər Əsəd və XİN rəhbəri Vəlid Müəllimlə rəsmi görüşlər keçirib.

Görüşdən sonra mediaya açıqlama verən nümayəndə heyətinin rəhbəri Filip Devinter bildirib ki, Bəşər Əsəd Rusiya, İran və Türkiyə üçlüyünün Suriya ilə bağlı gördüyü işləri təqdir edir, lakin rəsmi Ankaraya tam etibar etmir: "Əsəd, Türkiyənin iştirakı ilə baş verən dəyişikliyin Suriya üçün müsbət xüsusiyyət daşıdığına inanır. Suriyanı dəstəkləyən ittifaqın getdikcə genişləndiyini, İran və Rusiyadan sonra Türkiyənin də bu siyahıda olmasından məmnundur. Ancaq Əsəd hələ də Ərdoğan və Türkiyə rəhbərliyinin həqiqətən də Suriyanı dəstəklədiyinə tam inanmır. Ərdoğanın həqiqətən ona kömək üçün Suriyaya gəldiyini düşünmür."