Ağ Evin Milli Təhlükəsizlik məslələri üzrə məsləhətçisi general-leytenant Maykl Flinn tutduğu postdan istefa verib. Buna səbəb isə amerikalı generalın Rusiyanın ABŞ-dakı səfiri Sergey İvanoviç Kislyakla gizli telefon əlaqəsi yaratmasıdır.

Donald Trampın prezident postunu Barak Obamadan təhvil almasından əvvəl Flinn Kislyakla ABŞ-ın Rusiyaya tətbiq etdiyi sanksiyalar mövzusunda danışıq aparıb. Ağ Ev rəsmisi əvvəlcə iddiaları rədd etmiş və Kislyakla baş sağlığı mövzusunda danışdığını bildirmişdi.

Maykl Flinn istefa verməsi ilə bağlı məktub yazıb və orada Amerika xalqına xidmət etdiyini qeyd edib: "Rusiyalı səfirlə danışdığımın fərqində olmayaraq Ağ Ev rəhbərliyini düzgün məlumatlandırmamışdım. İstefa verirəm. Bu qədər şərəfli bir mövqedə ölkəmə və Amerika xalqına xidmət etməkdən şərəf duydum. Prezident Donald Trampla möhtəşəm komandası ABŞ tarixində ən böyük administrasiya olaraq yadd ediləcək".