İraq Hərbi Hava Qüvvələri İŞİD terror qruplaşmasının lideri Əbubəkr Əl-Bağdadiyə qarşı əməliyyat keçirib. Suriyanın Rəqqa şəhərindən İraqın Mosul vilayətinə gələn Əl-Bağdadinin gizləndiyi yer döyüş təyyarələri tərəfindən vurulub.

Əl-Ənbar şəhərinin Kaim məntəqəsində vurulan evdə Əl-Bağdadi ilə birgə 13 İŞİD liderinin də olduğu açıqlanıb. İŞİD liderinin ölməsi barədə məlumat təsdiqlənməsə də, terror təşkilatının təhlükəsizlik rəisləri Əbu Cənat əl-Ravi, Əbu Aişə İraqi, Əbu Malik Təlafər, mətbuat katibi Əbu Zeyd, Fərat vilayətindəki rəhbəri Əbu Məhəmməd əl-Hiyali, kimya alimi Əbu Hüseyn əl-Qureyşi, Mosuldakı döyüş komandirləri Əbu Əsid, Hişam Əbu Hənifə Bəlçiki, Əbdülqadir ər-Riqavi Əbu Məhəmməd, Nizar Mahmud Dihuş, Əbu Malik əl-Cizravi məhv edilib.
 
İraq Müdafiə Nazirliyi əməliyyatla bağlı məlumat yayıb ki, İraq kəşfiyyatı Əl-Bağdadinin avtomobil konvoyunun Rəqqa şəhərindən Ənbarın Kaim məntəqəsinə gəlməsi barədə məlumat alıb. Əl-Bağdadinin içərisində olduğu 3 avtomobildən ibarət konvoy 9 fevral tarixində Rəqqadan çıxaraq Suriya-İraq sərhədindəki Əbu Kamal məntəqəsinə çatıb. Avtomobillər dəyişdirildikdən sonra İŞİD liderinin dəstəsi Əl-Ənbarın Kaim məntəqəsindəki Ubeyd rayonuna gəlib. İraq döyüş təyyarələri kəşfiyyat məlumatlarından sonra görüş yerini bombardman edib.