Belarus hökuməti Donetsk və Luqansk "xalq respublikaları"nın pasportu ilə ölkə ərazisinə daxil olmaq istəyənləri cəzalandıracaq. Bu barədə ictimaiyyətə ölkənin Gömrük Xidmətinin rəsmisi Anton Bıçkovskiy məlumat verib. O, "BELTA" agentliyinə açıqlamasında deyib ki, ölkəsi beynəlxalq və ikitərəfli müqavilələrlə tanınan pasportlara malik vətəndaşların Belarusa daxil olmasına imkan verəcək .

Anton Bıçkovskiy həmçinin bildirib ki, sərhədi keçmək istəyərkən qaydaları pozan xarici ölkə vətəndaşları qanunvericiliyə uyğun olaraq məsuliyyətə cəlb olunacaq.
 
Xatırladaq ki, Rusiya  qondarma Donetsk  (DXR) və Luqansk (LXR) respublikaları vətəndaşlarının şəxsiyyətlərini təsdiq edən "sənədi" tanıyıb. Uyğun fərman Rusiya prezidenti Vladimir Putin tərəfindən imzalanıb. Pasportlardan əlavə şəxsiyyət vəsiqələri, təhsil və ya ixtisas "sənədləri", doğum haqqında şəhadətnamə, nikahın bağlanması (pozulması), ad dəyişdirilməsi, ölüm kağızı, nəqliyyat vasitələrinin qeydiyyat şəhadətnaməsi, nəqliyyat vasitələrinin  qeydiyyat  nişanələri tanınıb.
 
Fərmana əsasən, "DXR" və "LXR" sakinlərinə "pasportları" Donbasda vəziyyət nizamlanana qədər bu sənədlərlə Rusiyaya girişə izn verilir.