Fransanın “Milli cəbhə” partiyasının lideri Marin Le Pen İŞİD terrorçularının edam fotoşəkillərini paylaşdığı üçün barəsində istintaq açılıb. Fransada keçiriləcək prezident seçilərində də namizəd olan Marin Le Penin toxunulmazlıq hüququnun ləğvi gündəmə gətirilib.  

Ölkə Prokurorluğunun tələbi əsasında Avropa Parlamentinin (AP) Hüquq İşləri Komissiyasında səsvermə keçirilib. Komitənin 18 üzvü Le Penin toxunulmazlığının ləğvinə səs verərkən, yalnız 3-ü buna qarşı çıxıb. Məsələ növbəti mərhələdə Avropa Parlamentinin Baş Assambleyasının gündəminə çıxarılacaq. Əgər həmin qərar orada da öz təsdiqini taparsa, Le Penin mühakimə olunması reallaşacaq.

Qeyd edək ki, Le Pen 2015-ci ildə partiyası ilə İŞİD arasında paralellik yaradan bir jurnalistə reaksiya verərək sosial şəbəkədə terror təşkilatının üç edamla bağlı fotolarını paylaşım etmişdi.

Fransa qanunvericiliyində həddən artıq zorakılığı və şiddəti özündə əks etdirən görüntüləri yaymağa görə 3 il həbs və 75 min avro cəza nəzərdə tutulur.