Türkiyə və Almaniya arasında gərginlik pik həddə çatıb. Rəsmi Berlinin Türkiyənin iki nazirinə toplantı keçirməyi qadağan etməsi ölkələr arasında diplomatik qalmaqala səbəb olub.

Ankara və Berlin arasında gərginliyin ilk ünvanı iki ölkənin vətəndaşlığına malik "Die Welt" qəzetinin Türkiyə müxbiri Dəniz Yücelin həbs olunmasıdır. Rəsmi Ankaranın jurnalistin azad olunması tələbinə məhəl qoymaması Almaniya hökumətini qəzəbləndirib.  

Belə ki, Türkiyənin ədliyyə naziri Bəkir Bozdağ Almaniyanın Qaqqenau şəhərində məruzəçi kimi çıxış edəcəyi referendum tədbirində iştirak edə bilməyib. Buna səbəb isə ona Almaniyaya daxil olmaq üçün viza verilməməsidir. Həmçinin Türkiyənin iqtisadiyyat naziri Nihat Zeybekcinin Köln şəhərində 5 martda iştirtak edəcəyi toplantı da baş tutmayıb. Bu tədbirin də keçirilməsi üçün isə türkiyə tərəfinə heç bir konfrans zalı icarəyə verilməyib.

Mövcud durumla bağlı Almaniyanın Türkiyədəki səfiri Xarici İşlər Nazirliyinə çağırılıb. Səfir Martin Erdmanna türkiyə hökuməti adından şifahi və yazılı nota təqdim olunub.