Serbiyada prezidentliyə namizəd, hazırda baş nazir olan Aleksandar Vuçiç seçki kampaniyasına start verərək genişmiqyaslı mitinq keçirib. Seçiciləri qarşısında çıxış edən baş nazir bildirib ki, ölkəsinin Ukraynaya çevrilməsinə heç bir halda imkan verməyəcək.

Aleksandar Vuçiç mitinqdə çıxışı zamanı daha sonra bunları deyib: "Bizim ümumi məqsədimiz var. Biz istəyirik ki, Serbiya daha yaxşı, daha uğurlu və daha güclü olsun. Mən bizim partiyanın tərəfdarlarının deyil, ölkənin bütün vətəndaşlarının namizədi olacağam. Bir çox qüvvələr indi birləşiblər və sabitliyi zorakılıqla hədələyərək Serbiyanı Ukrayna və Makedoniyaya çevirmək istəyirlər. Amma mən imkan vermərəm ki, bizi xarici səfirlər və beynəlxalq mərkəzlər idarə etsin. Mən onlara Serbiyanı dağıtmağa imkan verməyəcəyəm."
 
Qeyd edək ki, Serbiya parlamentinin sədri elan edib ki, prezident seçkiləri ölkədə cari il aprelin 2-də keçiriləcək.