Türkiyənin hökumət rəsmilərinin referendum kampanyası keçirməsinə icazə verməyən Avropa ölkələri ilə rəsmi Ankara arasında gərginlik davam edir. Bu gün Türkiyə hökumətinə növbəti zərbə İsveçrənin "Blick" qəzetindən gəlib.

Belə ki, qəzet Türkiyə vətəndaşlarına müraciət edərək onları prezident idarəçiliyə qarşı səs verməyə çağırıb. Qəzetin manşeti yazısı "Ərdoğanın diktatorluğuna qarşı XEYR səsi verin" başlığı ilə dərc olunub.

Qeyd edək ki, Türkiyədə Konstitusiyaya dəyişikliklərlə bağlı referendum aprelin 16-da keçiriləcək. Konstitusiya dəyişiklikləri parlament idarəçiliyindən prezidentlik idarəçiliyinə keçidi nəzərdə tutur.

Dəyişikliklər referendumda qəbul olunarsa, millət vəkillərinin sayı 550-dən 600-dək artırılacaq. Parlament üzvü seçilmək yaşı 25-dən 18-ə endiriləcək. Parlament və prezident seçkiləri beş ildən bir eyni gündə keçiriləcək.