ABŞ prezidenti Donald Tramp Almaniya kansleri Angela Merkelə 375 milyard dollarlıq NATO müdafiə fakturası təqdim edib. Bu barədə "The Sunday Times" qəzeti Almaniya hökumətindəki qaynağına istinadən xəbər yayıb.

Kimliyinin açıqlanmasını istəməyən alman nazir qəzetə verdiyi açıqlamada 17 martda bağlı qapılar arxasında baş tutan Tramp-Merkel görüşündə Almaniya kanslerinə təqdim olunan sənədə etiraz edib: "Bu cür tələblərin konsepsiyası digər tərəfi qorxuya salmaqdır. Ancaq kansler bunu sakit qarşılayıb və belə təxribatlara reaksiya verməyəcək".
 
Qeyd edək ki, buna qədər Ağ Ev rəhbəri Donald Tramp Almaniyanın güclü və çox bahalı müdafiə üçün ABŞ və NATO-ya böyük bir borcunun olduğunu açıqlamışdı.