Bu sözləri tanınmış ekspert Natiq Cəfərli bildirib. Ekspert hadisəyə “söz azadlığı” müstəvisində yanaşmağa cəhd göstərənləri tənqid edib:

“İndi məhkəməni də tam açıq, şəffaf keçirməklə bütün dünyaya mövqeyimizi normal dildə çatdırmaq lazımdır. Məhkəmədən də, Lapşinin gətirilməsindən də şou düzəltmək olmaz, bu addımdan dünyaya hüquqi və sərt mesaj vermək üçün istifadə edilməlidir. Məsələyə “söz azadlığı” kontekstində baxmaq doğru deyil, bəzi insanlar belə bir səhv yolda düşünürlər”.

Qeyd edək ki, Rusiya, İsrail və Ukrayna vətəndaşlığı olan blogger Aleksandr Lapşin 2011-ci ilin aprelində və 2012-ci ilin oktyabrında Azərbaycanın işğal altındakı ərazilərinə qanunsuz səfərlər edərək separatçı rejimin təbliğatı ilə məşğul olub. O, Azərbaycanın ərazi bütövlüyünə qarşı çağırışlar edib. Üstəlik, Azərbaycan XİN-in qara siyahısında olmasına rəğmən, Ukrayna pasportu ilə Azərbaycana da səfər etməyi bacarıb. Buna səbəb isə Ukrayna pasportunda adının “Aleksandr” deyil, “Oleksandr” yazılması olub.

Azərbaycan Baş Prokurorluğu A.Lapşin haqqında Cinayət Məcəlləsinin 281.2 (dövlətə qarşı açıq çağırışlar) və 318.2 (sərhədi qanunsuz keçmək) maddələri ilə cinayət işi qaldırıb və o, beynəlxalq axtarışa verilib. A. Lapşin Belarusda saxlanılıb. Belarus baş prokurorunun müavini Azərbaycan tərəfinin ekstradisiya tələbini haqlı sayıb. A.Lapşinin vəkili bu qərardan Minsk şəhər Məhkəməsinə şikayət edib. Lakin Minsk Məhkəməsi Baş Prokurorluğun qərarını əsaslı sayıb.

Belarus Ali Məhkəməsinə verilən apelyasiya şikayətinə də ötən gün baxılıb. Məhkəmənin qərarı ilə A.Lapşinin iddiası rədd edilib. Belarus Avropa İnsan Hüquqları Məhkəməsinin üzvü olmadığına görə Ali Məhkəmə şikayət üçün son instansiya idi.

Aleksandr Lapşinlə bağlı uzun müddətdir davam edən məhkəmə qərarlarına Rusiya da başda olmaqla, bir sıra beynəlxalq qurumlar münasibət bildirmişdi və bu məsələni hüquq müstəvisindən çıxarmağa çalışırdılar. Rusiya XİN “Rusiya vətəndaşı olan Lapşinin Azərbaycana ekstradisiyasının düzgün olmadığı” barədə mövqeyini də ortaya qoymuşdu.

Ancaq Belarus Prezidenti Aleksandr Lukaşenko bir neçə gün öncə verdiyi məşhur bəyanatda “Lapşini Azərbaycana verməmək üçün heç bir bəhanə olmadığını” ən yüksək səviyyədə elan etmişdi.

Ötən gün gecə saatlarında A.Lapşinin Azərbaycana ekstradisiyası baş tutub. Lapşin hazırda Kürdəxanıdakı 1 saylı İstintaq Təcridxanasındadır.