Ataxan Əbilov

İndi oxudum ki, orta təhsil aldığım Masallı rayonun Hişkədərə kənd orta məktəbində tarix müəllimi Cəlil İmanov siyasi baxışlarına görə işindən uzaqlaşdırılıb.

Hişkədərə kənd orta məktəbi böyük təhsil ənənələri olan bir məbəddir. Bu məktəbin adı tarixə yazılmış böyük müəllimləri olub. Yaxın keşmişdə bu məktəbə rəhbərlik etmiş Firudin Mirzəyev, Aydın Kərimov kimi müəllimlərimizi necə unutmaq olar?

Məktəbin məzunları bu gün dünyanın dörd bir tərəfində Azərbaycanı, Masallını və Hişkədərə kəndini ləyaqətlə təmsil edirlər. Məzunlar məktəbimizlə və onun peşəkar, vicdanlı və qayğıkeş kollektivilə həmişə fəxr ediblər.

Marifçilik və pedaqoji fəaliyyətin özü tələb edir ki, insanlara siyasi mövqeyə görə fərq qoymaq olmaz. Azərbaycanda siyasi baxışlarına görə insanlar arasında fərq qoyan hazırkı iqtidarın iyrənc siyasəti artıq müqəddəs məbədimizin qapılarını döyüb.

Mən Hişkədərə kənd orta məktəbin pedaqoji kollektivini mövqe nümayiş etdirməyə çağırıram. Əgər söhbət gedən olayda zərrə qədər siyasi motiv varsa, bu iyrəncliyə müqavimət göstərməyə, məktəbin tarixinə yazılacaq bu biabırçılığa getməməyə səsləyirəm.

Yazı müəllifin Facebook səhifəsindən götürülüb