İranın "İstiqlal" klubu Fatih Terimlə müqavilə bağlamağa hazırlaşır. Klub rəhbəri Əmir Sultani təcrübəli mütəxəssislə İstanbulda görüşdüklərini açıqlayıb.

Baş məşqçi axtarışlarını davam etdirən İranın "İstiqlal" klubunun rəhbəri Əmir Sultani Terimlə İstanbuldakı evində görüşüb. O, "Təsnim" agentliyinə bildirib ki, artıq rəsmi təklif səsləndirilib, Fateh Terim isə bu təklifdən qürur duyduğunu söyləsə də, bəzi tələblər irəli sürüb.

Sultani Terimin tələblərini "İstiqlal" İdman Klubunun prezidenti Riza İftixariyə çatdırdığını və son qərarın verilməsi üçün klub rəsmiləri ilə görüşəcəklərini bildirib. Əmir Sultani Terim üçün yüksək maaş verməyə imkanı olduqlarını bildirərək, "bu pulu reklam pullarından və başda "Qalatasaray" olmaqla Türkiyə komandaları ilə keçiriləcək yoldaşlıq görüşlərindən əldə ediləcək gəlirlər sayəsində ödəyəcəyik", - deyib.

O əlavə edib ki, yaxın günlərdə hər şey aydın olacaq.