Qubad İbadoğlu

Prezident İlham Əliyev Davos Forumunda çıxışında bildirib ki, Azərbaycan əhalisi son 15 ildə 1,5 milyon nəfər artıb. Əmək və Əhalinin Sosial Müdafiəsi naziri Səlim Müslümov da açıqlayır ki, həmin dövrdə, yəni 2003-2017-ci illərdə 1,9 milyon yeni iş yeri açılıb. Sizcə, kimə inanaq?
Belə ki, həmin dövrdə bağlanan iş yerlərinin sayını da nəzərə alanda bəlli olur ki, son 15 ildə Azərbaycanda nəinki işsizlik problemi həll edilib, 16 yaşına qədər olan uşaqlar, 75 yaşdan yuxarı qocalar, yaşı 90-dan çox olan uzunömürlülər də işlə təmin olunub, hətta artıq qalan iş yerləri üçün xaricdən 100 minlərlə əmək miqrantı gətirilib. Bu, həm də o halda mümkündür ki, həmin dövrdə Azərbaycandan xaricə iş axtarmağa gedən olmasın.
Böyük Britaniyanın keçmiş baş naziri Benjamin Dizraeli deyirdi ki, yalanın üç dərəcəsi var: yalan, ağ-yalan və statistika. Sizcə, son 15 ildə 1,9 milyon yeni iş yerinin açılması bəyanatında həqiqət yükü nə qədərdir və bu yalanın hansı dərəcəsidir?