ABŞ-ın neft hasilatının artması, Neft İxrac edən Ölkələr Təşkilatının (OPEC) və tərəfdaşlarının qiymətləri yüksəltmək məqsədilə hasilatlarını azaltmaları səyləri üçün ən böyük təhdid olmaqda davam edir.

Baker Hughes-ın açıqladığı məlumatlara görə, ABŞ-da aktiv qazılan neft quyularının sayı keçən həftə 26 quyu artaraq 791-ə qalxıb.  Bu say 2015-ci ilin Aprel ayından bu yana ən yüksək səviyyədir.

Bundan başqa, ABŞ Enerji İnformasiya İdarəsinin (EIA) açıqladığı məlumatlarına görə, ölkənin xam neft hasilatı ötən həftə 10,25 milyon barelə çıxaraq ölkə tarixində ən yüksək səviyyəyə çatıb (rekord) və dünyanın ən böyük ikinci xam neft istehsalçısı olan Səudiyyə Ərəbistanının istehsalını da geridə qoyub.
EIA-nın dərc etdiyi hesabatına görə, ABŞ-ın gündəlik xam neft hasilatının bu il 10,6 milyon barrelə yüksəlməsi, gələn il də 11,2 milyon barrelə çataraq dünyanın ən böyük xam neft istehsalçısı olan Rusiyanı keçəcəyi gözlənilir.

Analitiklər neft qiymətlərinin 50 dollar səviyyələrinə düşə biləcəyini dilə gətirirlər.

“Neft qiymətləri ABŞ-da istehsalın artmasına səbəb olacaq səviyyələrə qalxmışdı. Elə də oldu, ABŞ-da hasilat artır. İndi neft, çox sürətlə bahalaşmasının əvəzini ödəyir. Həmçinin son vaxtlar birjalardakı qeyri-müəyyənlik və dolların bahalaşması neft qiymətlərinə pis təsir edir”,- analitiklər bildirir.

Neft ötən həftə təxminən 10% ucuzlaşdıqdan sonra bu gün dolların bir qədər ucuzlaşması ilə əlaqədar olaraq 1% bahalaşıb. Bakı vaxtı ilə saat 08:40-da Brent nefti 63,38 dollardan alıcı tapıb.