Özbək tarixçiyə Azərbaycana görə təzyiqlər olunur

Tarix:31-01-2017, 15:04 Baxış Sayı:91

Qarabağ Azadlıq Təşkilatı (QAT) tanınmış özbək tarixçi-publisisti Şuxrat Salamova (Barlas) qarşı ermənilər tərəfindən təşkil olunmuş təzyiqlərə qarşı bəyanatla çıxış edib. Qurumdan daxil olan Bəyanatda deyilir: “Özbəkistanda yaşayan tanınmış özbək tarixçi-publisisti Şuxrat Salamova (Barlas) qarşı ermənilər tərəfindən törədilən təzyiq, təhdid, təhqir kamapaniyasını qətiyyətlə pisləyirik. Ş.Salamov erməni terror təşkilatlarının, o cümlədən Daşnaksütyan partiyasının bütün dünyada, həmçinin Orta Asiyada, Azərbaycanda törətdiyi qanlı olaylar, Ermənistanın Azərbaycana qarşı təcavüzü, Azərbaycan torpaqlarının işğalı, Xocalı soyqırımı və digər dəhşətli hadisələrlə bağlı kitablar, məqalələr yazıb, konkret faktlarla erməni işğalçılığını və terrorizmini ifşa edib. Ermənilərin arqumentləri varsa, ona elmi dildə, yazıları ilə cavab verə bilərdilər. Amma aydındır ki, onların deməyə sözləri yoxdur, ona görə də təzyiq və təhdidlərə əl atır, onun özünü, ailəsini hədələyir, psixoloji təzyiq altında saxlayır, həmçinin Özbəkistan hüquq-mühafizə orqanlarının əli ilə ona divan tutdurmağa, məhkəmələrə çəkməyə çalışırlar. Bu, bir erməni məkri, təxribatıdır. Bununla onlar Azərbaycanla Özbəkistan arasında dost və qardaş münasibətlərinə də xələl gətirmək məqsədi güdürlər.

Biz əminik ki, ermənilər öz məkrli niyyətlərinə nail ola bilməyəcəklər. Azərbaycanla Özbəkistan arasında həmişə dost və qardaş münasibətləri olub və bu münasibətlər davam edəcəkdir. Özbəkistan Dağlıq Qarabağ məsələsində həmişə obyektiv mövqe tutub, Azərbaycanın haqlı mövqeyini müdafiə edib. Biz buna görə həmişə Özbəkistan rəhbərliyinə və xalqına minnətdarlığmızı bildirmişik və bildiririk. Biz inanırıq ki, Özbəkistan rəhbərliyi və cəmiyyəti Şuxrat Salamov (Barlas) məsələsində də obyektiv mövqe tutacaq, iki qardaş və dost xalqın arasında erməni məkrinin yer almasına imkan verməyəcək, Azərbaycan və özbək xalqları arasında ən yaxın və isti münasibətlər əbədi olaraq davam edəcəkdir”.

ŞƏRH YAZ