Pənah Hüseyn təmasların azalmasının səbəbini açıqladı

Azərbaycandakı diplomatik korpus təmsilçiləri, ABŞ və digər bəzi ölkələrin səfirlərinin müxalifət partiyalarının liderləri ilə görüşləri əvvəllər vaxtaşırı keçirilirdi. Son zamanlar isə bu cür görüşlərə demək olar ki, rast gəlinmir. Hansısa ümumi tədbirlərdəki görüşləri çıxsaq, sanki təmaslar tamamilə kəsilib.

Azərbaycan Xalq Partiyasının sədri Pənah Hüseyn bu barədə açıqlamasında bildirdi ki, son zamanlar diplomatik korpus təmsilçiləri ilə müxalifət liderlərinin görüşlərinə həqiqətən də əvvəllər olduğu kimi vaxtaşırı rast gəlinmir. Bu cür görüşlərdə təşəbbüs hər iki tərəfdən olmalıdır: “Bizim tərəfimizdən belə təşəbbüslər olmayıb. Qarşı tərəfdən də olmayıb”. Pənah Hüseyn bu cür görüşlərin son zamanlar nadir hallarda olmasının bir neçə səbəbinin ola biləcəyini dedi: “Son illərdə Azərbaycan iqtidarı diplomatik korpus və beynəlxalq təşkilat təmsilçilərinin müxalifətlə təmas qurmasına, əlaqələr yaratmasına həssas yanaşır və hətta təzyiq göstərir. Əvvəllər müşahidə olunan vaxtaşırı görüşlərin son zamanlar olmaması bununla bağlı ola bilər. Bütövlükdə ölkədə qapalılıq artıb. Bu, özünü sözügedən sahədə də göstərir. Yerli təşkilatların xarici təşkilatlar və səfirliklərlə əlaqələr qurmasına mümkün qədər mane olmaq xətti yürüdülür, görüşlərin qarşısını almağa çalışılır”.

Bununla belə, AXP sədri vurğuladı ki, nə qədər maneələr olsa da diplomatik korpusla artıq ümumiyyətlə heç bir görüşün olmadığını söyləmək də düz olmazdı: “Vaxtaşırı olmasa da hərdən görüşlər olur, görüşənlər var. Müəyyən siyasi təşkilatların rəhbərliyinin görüşləri haqqında arada informasiyalara rast gəlmək olur. Yəni diplomatik korpusla heç bir əlaqənin olmadığını söyləmək də olmaz.

Hazırda müəyyən təcridolunma meylləri müşahidə olunur. Bu da özünü keçirilən görüşlərin intensivliyinin azalmasında göstərir. Hesab edirəm ki, bu vəziyyət müəyyən bir keçid dövrüdür. Demokratiya, onun tərkib hissəsi olan insan hüquqları ilə bağlı ümumiyyətlə son dövrlərdə dünyada, əsasən də keçmiş SSRİ məkanında ciddi geriləmələr müşahidə olunur".