Prezident Ərdoğanın Avropa Birliyinə ünvanlanmış çıxışına Avropa Parlamentinin Türkiyə üzrə məruzəçisi Kati Piridən cavab gəlib. Piri yeni bir səhifə açılmasının gündəmdə olmadığını bildirib. Piri Almaniyanın Xarici işlər nazirinə cavab olaraq “Qabriel Türkiyə ilə üzvlük müzakirələrinin kəsilməsinə müqavimət göstərməklə Avropa Birliyinin inandırıcılığını təhlükəyə salır” deyib.

Prezident Rəcəb Tayyib Ərdoğan dünən Türkiyə və Avropa Birliyi (AB) əlaqələrinə toxunaraq demişdi: “Almaniyada baş verənlərə baxırıq. Fəlakətdir. PKK-ya hər cür dəstək verilir. Yaxşı bunlar niyə verilir? Güclənən Türkiyənin önünü kəsmək üçün verilir. İndi də ” bundan sonra nə edəcəyik?” deyirlər. Bu günə qədər nə etdiyiniz ortada. Bu günə qədər açmadığınız səhifələri açmaqdan başqa çarəniz yoxdur. Bunu açsanız əla, açmadığınız halda sizə gülə-gülə. Türkiyə bunların qulu deyil. Verdiyiniz sözləri tutacaqsınız. Ondan sonra masaya oturar, danışarıq. Əks halda sizinlə görüşəcək bir şeyimiz qalmadı.”

Ərdoğanın sözlərinə cavab verən Kati Piri “Türkiyə həqiqətən üzvlüklə maraqlansaydı, Ankaranın bunu göstərməsi lazım idi” deyib. Piri Avropa Birliyinin üzvlük məsələsində heç bir ölkənin şantajına boyun əyməyəcəyini, bunun Türkiyə üçün də etibarlı olduğunu bildirib. O, “AB-yə girmək istəyən, meyarları yerinə yetirmək məcburiyyətindədir, amma Türkiyədə bunu heç görə bilmirəm” söyləyib və müzakirələrin kəsilməsinin gərək olduğunu vurğulayıb.

Almaniyanın Xarici işlər naziri Siqmar Qabrieli də tənqid edən Piri onun Ankara siyasətini dəyişdirməli olduğunu deyib.
“Qabriel Türkiyə ilə üzvlük müzakirələrinin kəsilməsinə müqavimət göstərməklə Avropa Birliyinin inandırıcılığını təhlükəyə salır və Türk vətəndaşlarının konstitusiya islahatına “xeyr” deyən yarısının görüşünü heçə sayır” vurğulayıb.
Piri Qabrielə xitabən “insan hüquqları pozuntularına səsini çıxarmayan, Avropa əleyhdarlarının da çörəyinə yağ sürtər” deyib.