2015-ci ilin sentyabrında “France 2” televiziyası ilə yayımlanan araşdırma proqramında E.Lucet rəsmi Bakını  dünyanın ən qəddar diktaturalarından biri, Richard isə “France Info” radiosuna müsahibəsində Azərbaycandakı hakimiyyəti “diktatura” rejimi adlandırmışdı.

Rəsmi Bakının iki fransız jurnalist barəsində qaldırdığı iddia Azərbaycanda diktatura rejiminin davam etməsini bir daha sübuta yetirirb. 

Fransa məhkəməsi 2 fransız jurnalist barəsində Azərbaycan hökumətinin qaldırdığı iddiaya baxıb. Noyabrın 7-də məhkəmə jurnalistlərə senzura qoyula bilməyəcəyinə dair hökm çıxarıb.

Bu barədə jurnalist Laurent Richard “Facebook” səhifəsində də yazıb. O bildirib ki, artıq Fransa məhkəməsinin də rəsmi qərarı var və bu qərar Azərbaycandakı rejimin diktatura adlandırılmasının suç təşkil etmədiyini sübuta yetirir: “Azərbaycan diktatura adlandırıla bilər və Azərbaycan xaricə senzura ixrac edə bilməz”.

Qeyd edək ki, Jurnalistlər diffamasiyada ittiham olunurdular. Beynəlxalq media qurumları bu iddianı Bakının “Fransaya senzuranın ixracı” cəhdi adlandırırdılar. Richard və operatoru 2014-cü ilin mayında Bakıdan çıxan zaman qısa müddətə saxlanılmış və avadanlıqları əllərindən alınmışdı.

“Sərhədsiz Reportyorlar” Təşkilatının (RSF) Şərqi Avropa və Orta Asiya bölümünün rəhbəri Johann Bihr məhkəmədə fransalı jurnalistlərin müdafiəsi istiqamətində ifadə verib. Digər şahidlər azərbaycanlı jurnalist Aqil Xəlil və insan haqları fəalları Leyla və Arif Yunuslar olub.

RSF fransalı jurnalistlərə qarşı iddianı “Azərbaycan hökumətinin azad sözə nifrətini sərgiləyən qorxutma cəhdi” adlandırıb.

Qurumun bildirməsinə görə, ilk dəfədir ki, xarici hökumət Fransa məhkəməsində jurnalistlərə qarşı defamasiya iddiası qaldırıb.

RSF-in 2017-ci il Ümumdünya Mətbuat Azadlığı İndeksinə görə, Azərbaycan 180 ölkə arasında 162-ci yerdədir. Azərbaycan prezidenti İlham Əliyevsə RSF-in “mətbuat azadlığının düşmənləri” siyahısına salınıb. 

Sərxan Xusiyev