Meyitdən 39 gün qisas olan bir düşməndən əlbəttə ki, hər cür hoqqabazlıq, allahsızlıq və alçaqlıq gözləmək olar. Biz ermənilərin Azərbaycana qarşı hər cür xəbisliyə hazır olduğuna öyrəncəliyik – o ayrı məsələ ki, ona həmişə adekvat cavab verə bilirikmi, bilmişikmi? 

Bu, o düşməndi ki, əlacı olsaydı, şəhid əsgərimiz üzərində də saxta məhkəmə qurar, ondan “ifadə” alardı. Zatən, şəhidimizin sosial şəbəkələrdə yayılan son fotosundakı kəsik, qançır yerləri göstərir ki, buna cəhd də ediblər. Əsgərimizin meyitini “müvafiq ekspertizalar aparılır” absurd iddiası ilə 39 gün İrəvanda boşuna saxlamırdılar ki... 

İndi də Elnurla bağlı məhkəmə tamaşası göstərəcəklər. Hədəf və ssenari təxminən belədir: Dilqəm və Şahbaz kimi, Elnuru da “DQR”-in “sərhədlərini” qanunsuz şəkildə keçdiyi üçün Xankəndi “məhkəməsi” mühakimə edəcək. Lakin Elnurun üzərində qətl ittihamı olmadığı üçün ona Diqləm və Şahbaz kimi ömürlük və ya 22 illik həbs yox, hardasa 5-6 illik “cəza” kəsəcəklər. 

Sonra da kəsilən cəzanın legitimliyini nümayiş etdirmək üçün Elnuru qondarma qurumun “prezidenti” Bako Saakyanın adına əfv yazmağa məcbur edəcəklər. Bunun ardınca Saakyan “humanizm” göstərib girovu azad eləməklə və ya Azərbaycan qaytarmaqla növbəti bir şou düzənləyəcək. Dünyaya göstərməyə çalışacaqlar ki, baxın, Dağlıq Qarabağda necə bir “ədalətli hökumət”, “qanunları işləyən oturuşmuş hüquqi dövlət” var.

Yada salaq ki, Dilqəm və Şahbaza vaxtilə analoji təklif olunub. Fəqət, onlar əfv diləməkdən imtina ediblər. Düz də ediblər. Çünki Azərbaycan həbsxanasının darıxdığı bir cinayətkardan əfv diləmək – qondarma respublikanın legitimliyinin tanımaq, işğala haqq qazandırmaq demək olardı. 

Yəni, separatçılar növbəti hüquqi bespredellə Azərbaycanı fakt qarşısında qoymaq və şantaj eləmək niyyətindədirlər. Guya ki, beynəlxalq hüququn “DQR” adında subyekti varmış. Ən önəmlisi, bununla çalışırlar ki, girovlarla bağlı Azərbaycan İrəvana deyil, Xankəndinə müraciət etmək zorunda qalsın.

Zaur üzərində məhkəmə tamaşası ermənilərə indi yəhudi blogger Aleksandr Lapşinin Azərbaycana ekstradisiyası fonunda təbliğati kompensasiya kimi xüsusilə lazımdır. Bir növ, dünyaya mesaj vermək istəyəcəklər ki, “siz Azərbaycan sərhədini qanunsuz keçdiyi üçün Lapşini həbs etdiniz, biz də “DQR”in “sərhədini” pozduğu üçün Elnur Hüseynovu mühakimə edirik. Başqa sözlə, Lapşinin qisasını Elnurdan (Azərbaycandan) alacaqlar.

Azərbaycan ermənilərin bu təbliğati hay-küyünə və məhkəmə şoularına qarşı nə etməlidir? Əlbəttə ki, ilk növbədə bu şoulara hər hansı şəkildə haqq qazandıracaq addımlardan çəkinməliyik. Girovlarla bağlı Xankəndi rejimi ilə hansısa birbaşa təmasdan, xahiş-minnətdən söhbət belə gedə bilməz. Əks halda, ermənilər bunu dərhal separatçı qurumun münaqişədə müstəqil tərəf qismində tanınması kimi qələmə verəcəklər. Onların illərdir çalışdıqları da elə budur ki, Bakı Dağlıq Qarabağdakı qanunsuz rejimi tərəf kimi tanısın.

İkincisi, bütün mötəbər beynəlxalq qurumların tribunalarından, o sırada nüfuzlu insan haqları təşkilatların, dost-müttəfiq dövlətlərin imkan-potensialından, lobbi fəaliyyətindən istifadə edib girovlarımız üzərindəki saxta məhkəmələri ifşa etməliyik. Dağlıq Qarabağda faktiki surətdə kriminal, beynəlxalq qanunlardan kənar, terrorçu bir rejimin mövcud olması haqda yorulmadan təbliğat aparmalıyıq. Məsələni, ələlxüsus da Ermənistanın şəriksiz sahibi Rusiyanın müvafiq orqanları qarşısında qaldırmalıyıq.

Şübhə yox ki, anti-təbliğatımızın dişli və effektli olması üçün daha bir şərt var. Bu da odur ki, öz daxilimizdə - Azərbaycanın yerdə qalan 4/5-də təməl insan haqlarına əməl olunduğuna, siyasi məhbusların yoxluğuna sivil dünyanı inandırmağı bacarmalıyıq. Başqa sözlə, özümüzə də bir az tənqidi yanaşmalıyıq. “Azərbaycanda hüquqi-demokratik dövlət qurulub” deməklə iş bitmir. Gərək ki, dünya da bunu etiraf eləsin. O zaman erməni it uşağına soydaşlarımızı girov saxlamaq çətin olacaq. Çox çətin olacaq...

Zahid Səfəroglu