Bu il həccə getməyin qiyməti milli valyutamızın dollar cəhənnəminə vasil olması səbəbindən 8 min manata qalxdığı üçün cəmi 600 müsəlmanımız Məkkəyə yollana biləcəkdir, əvəzində isə minlərlə müsəlman idmançı Bakımıza təşrif buyuracaqdır, əvəzi çıxacaqdır. Məşhur ərəb şeyxlərindən Əl Qulqul bin Pulpul əbu Dəvədabani keçən cümə Dübaydakı məşhur Bürc-əl-Ərəb məscidindən bütün dünya müsəlmanlarına Azərbaycana ördək ovuna getməyi məsləhət görmüşdür. 

Təbii ki, bütün bunlar bizi sevindirməyə bilməz. Hərçənd, dilxoredici məqamlar da var. Misal üçün, adından göründüyü kimi, bu, 4-cü müsəlman oyunlarıdır. Bəs bunun qabaqkı 3 dənəsi harada  olubdur? Niyə biz bundan xəbər tutmamışıq, nə üçün qabaqkı islam oyunları da Bakıda keçirilməyibdir? Əsas oynağan biz ola-ola, oyunları niyə başqaları keçiribdir? Pensiyaçılar təqaüdündən, həkimlər maaşından, tələbələr yol pulundan, jurnalistlər qonorarından, icra hakimləri yeyintidən, əsgər və zabitlərimiz başından keçməyə hazırdır, təki respublikamızda həmişə hansısa oyunlar olsun, idmançılar tatami üzərində dombalaq aşsın. 

Fikrimcə, qabaqkı 3 islamiadadan xəbərsiz olmağımız, estafeti əldən verməyimiz Xarici İşlər Nazirliyinin yarıtmaz fəaliyyəti ilə sıxı surətdə bağlıdır. Biz xaricdə səfirlikləri elə buna görə saxlayırıq ki, onlar gözdə-qulaqda olsunlar, harda bir idman turniri, yiyəsiz qalmış yarışdan-zaddan tapsalar, dərhal götürüb vətənimizə gətirsinlər, respublikamızın şöhrəti aləmə yayılsın. Bunlar isə 3 turnir yatıblar! Dəhşətdir. Birinci bizdə olmayıb, ikinci başqa yerdə olub, barı üçüncüdə oyanaydınız! Dörd nə deməkdir?! Məncə Elmar müəllim istefa versin, yerinə Polad Bülbüloğlu qoyulsun. Polad müəllimin heç olmazsa babat səsi var, mahnı oxuyub turnirləri vaxtında aşkar edəcəkdir. 

Gənclər və idman naziri Azad Rəhimov təzəlikcə bir açıqlama verdi, dedi ki, dünyada olan 57 müsəlman dövlətindən 50-i Bakıya gəlməyə razılıq verib. Qalan 7 dövlət tamam lüt-ətcəbala imiş, yarışa gəlməyə pul tapmayıblar, Azad müəllim onların iştirak pulunu Azərbaycanın ödəyəcəyini muştuluq vermişdir. 

Halal olsun. Ancaq niyə qalan 50 dövlət bəzi xərclər çəksin? Onların da hər bir xərcini biz verə bilmərikmi? Avropa Oyunlarında hamısını biz vermişdik. İndi elə çıxacaq ki, Azərbaycanın avropalılara münasibəti müsəlmanlara münasibətindən daha istidir. Məcburi köçkünlərin bəziləri işıq pulu kompensasiyasından imtina edib o pulları dövlətə bağışlamışdı, indi biz oyunlar yaxşı keçsin deyə qazın, benzinin qiymətini qaldıra bilmərikmi? İndicə Zəngilan müəllimləri və Füzuli həkimləri ilə əlaqə saxladım, onlar bildirdilər ki, oyunların xərcini tam ödəmək üçün il boyu pulsuz işləməyə can-başla hazırdırlar. İnsan belə zəhmətkeşləri görəndə gözləri dolur. 

Yeddi demişkən, Amerikada Trampın viza embarqosu qoyduğu yeddi müsəlman dövlətin siyahısını görəndə mənim ağlıma fantastik dövlətçi bir ideya gəldi: olmazmı biz həmin 7 müsəlman dövlətini Bakıya çağırıb onlar üçün ayrıca idman turniri keçirdək? 

Türkdilli xalqlar arasında Turan Oyunları, İranla sərhədi olan dövlətlər arasında İran Oyunları, bənnalar arasında Qaldırıcı Kran Oyunları və sairə turnirlər də bizim təşəbbüs qaldırmağımızı gözləyir.  

ATƏT-in Minsk Qrupunun həmsədri olan dövlətlərlə birgə Qarabağ Oyunlarının da vaxtı çoxdan keçir. Bir də görəcəyik kimsə artıq üçünü keçirib, dördüncü bizə qalıb...