Ona Lapşinin Azərbaycana və Ermənistana, eləcə də Dağlıq Qarabağa səfərinin ardından öz bloqunda yazdığı materialın kopyasını göstədilər, oxudu və yekun reaksiyası belə oldu: “Vay, yaramaz. Buna bax ey. Beləsi tutub...”

Həmkarımızın Lapşin barədə hipotetik hökmü elə oldu ki, bloqçu özü könüllü şəkildə həbsi və ekstradisiya olunmağı üstün tutardı. Çünki yarım saat əvvəl Lapşini müdafiə edən söz adamının son fikri çox amansız idi. O, elə bilirmiş ki, bloqçu Dağlıq Qarabağa sıradan bir səfər edib və ölkəmizdəki siyasi rejimin əleyhinə nələrsə yazıb. 

Ancaq Lapşinin yazdıqları başqa cür idi, o, ölkəni ələ salır, aşağılayır, alayçı bir tövrdə 150 avro qarşılığında Azərbaycanın qanunlarını bir daha tapdalaya biləcəyini vurğulayır, ölkəmizin “DQR”-ə səfər edənlərlə bağlı tərtib etdiyi qara siyahıya rişxənd edir, o siyahıda 16-cı yerdə yox, 1-ci yerdə olmağa “çalışdığı”nı yazır.

Budur, Lapşin öz arzusuna çatıb, artıq həmin “qara siyahı”nın başındadır və başqa bir dövlətin sərhədini pozduğu üçün yaxalanıb ekstradisiya edilən ilk adam kimi qeydə alınıb, üstəlik, həbsi ilə bağlı ən azı 5 dövlətin (Rusiya, Belorus, Ermənistan, İsrail və Azərbaycan), eləcə də xeyli beynəlxalq təşkilatın qarışdığı qalmaqal yaranıb. 

Xalid Kazımlı

İndi bloqçu Lapşin şöhrətinin zirvəsindədir. Hamı ondan danışır, yazır. 

Bir müddət əvvəl o, Azərbaycana, onun sərhədinə, qanunlarına lağ edir, ələ salırdısa və bu ironiyası ilə əsasən ermənilərdə gülüş dalğası yaradırdısa, indi arvadı, anası gözyaşlarına boğulub, gümanları gələn hər kəsə yalvarırlar. 

Lapşinin gülüş doğuran yazılarının yerini yalvarış dolu xahiş məktubları alıb. 

Söz yox, bu adamı uzun müddət həbsdə saxlamayacaqlar, bir müddətdən sonra, loru dildə desək, zıl yemişə xətm edib azad buraxacaqlar. Amma bu hadisə ibrətamiz olacaq, başqaları, Lapşin kimi hərəkətlər etməyə şirniklənənlər öz dərslərini alacaqlar. 

Həmişə olduğu kimi, yenə də “demokratiya prinsiplərini prioritet sayan”, hər şeyə müxaliflik edən “daimi dissidentlər” var və onlar ölkəmizə həqarət edən bu şəxsin tutulub gətirilməsinə, yumşaq desək, dodaq büzürlər. 

Yaxşı, nə olsun? Gələn, gedən bu ölkəyə döşəsin? Hər zaman bizi aşağılasınlar, ələ salsınlar? Çoxmu xoş durumdur bu? 

Lapşin həm də İsrail vətəndaşıdır, baxaq görək, onun vətənlərindən biri olan İsrail bu sayaq durumlarda nə edərdi, beynəlxalq səviyyədə ələ salınmasına, təhqir olunmasına dözərdimi, qanunlarının pozulması faktı ilə barışardımı, bununla fəxr edən adamı cəzasız buraxardımı? 

Nəinki İsrail, özünə hörmət qoyan və qoyulmasını istəyən heç bir dövlət bununla razılaşmaz. Hətta Ermənistan kimi ultra-millətçi dövlətlər belə adamı düşmən elan edər, qətlinə fərman verər. 

Xatırlayırsınızsa, 2012-ci ilin mayında da bənzər bir hadisə olmuşdu. O zaman İran dövləti avropalıların Bakıya axışmasında narahat olmuş, Azərbaycana düşmən kəsilmişdi və siyasətçilərdən tutmuş məscid axundlarına qədər xeyli nüfuzlu şəxs hər çıxışlarında ölkəmizə lənət yağdırırdı. Bu arada Norveçdən gələn və əslən iranlı olan bir jurnalist yarışmanın keçiriləcəyi “Kristal holl”un fonunda milli bayrağımıza şıllaq atmış, bizi ələ salmağa cəhd göstərmişdi. Ancaq bu şıltaqlığı ona bağışlamadılar. Şıllaqatan jurnalist ölkəni tərk edərkən aeroportda onunla elə davrandılar, onun özünü elə ələ salıb təhqir etdilər ki, nəinki bayrağa şıllaq atmağına, hətta ölkəyə gəlməyinə də peşman oldu. 

Ola bilər, o hadisədə bəzi qayda-qanunlar pozulmuşdu, insan haqları ilə ziddiyyət təşkil edən hərəkətlərə yol verilmişdi. Bu, əlbəttə, düzgün deyil. Amma hamı bilməlidir ki, bir ölkənin paytaxtının mərkəzində dünyaya göstərə-göstərə dövlətin müqəddəs atributuna qarşı təhqiramiz hərəkət etdikdən sonra öz şərəf və ləyaqətini toxunulmaz saxlayaraq aradan çıxmaq mümkün deyil. 

Lapşinin başına gələnlər öz məsuliyyətsizliyinin, qanacaqsızlığının və yeniyetmələr kimi “hər sözə bir söz qoşmaq”, lağlağı etmək xobbisinin məhsuludur.