Macarıstan baş naziri Viktor Orban 1956-cı il Macar İnqilabı və Müstəqillik Müharibəsinin 61-ci ildönümü münasibətilə Budapeştdə keçirilən tədbirdə Avropa Birliyi ilə bağlı maraqlı çıxış edib. O, milyonlarla qaçqın və köçkünün Avropanı zəbt etdiyini bildirərək, "Etibarlı, ədalətli, dinc, xristian və azad Avropa istəyirik",- deyə vurğulayıb.

Viktor Orban həmçinin deyib ki, Avropanı qarışıq xalqların yaşadığı bir qitəyə çevirmək üçün planlar hazırlanır: "Milyonlarla qaçqın və köçkün Avropanı zəbt edib. Bu plana yalnız Mərkəzi Avropa ölkələri qarşı çıxır. Bugün Avropada qaçqınların olmadığı son region da Mərkəzi Avropadır. Avropada keçirilən seçkilər qitənin taleyini müəyyən edəcək. Çünki xalqlar Avropanı bürokrat rəhbərlərin idarə edib-etməyəcəyini müəyyənləşdirəcək. Biz etibarlı, ədalətli, dinc, xristian və azad Avropa istəyirik".