Qazaxıstan prezidenti Nursultan Nazarbayev qazax dilinin latın qrafikalı əlifbaya mərhələli keçidi haqqında fərman imzalayıb.

Bu barədə “RİA Novosti” məlumat yayıb. 

Fərman Qazaxıstanın 2025-ci ildə tam şəkildə latın qrafikalı əlifbaya keçməsini nəzərdə tutur.

Qazaxıstan əlifbasının latın qrafikasına keçid prosesini təmin etmək üçün milli komissiyanın yaradılması barədə də göstəriş verilib.

Məlumata görə, fərmana latın qrafikasına əsaslanmış qazax  dilinin 32 hərfdən ibarət əlifbası əlavə edilib.  

Xatırladaq ki, bir müddət əvvəl Qazaxıstan prezidenti Nursultan Nazarbayev bildirmişdi ki, qazax dilinin latın qrafikasına keçirilməsi üçün heç bir problem qalmayıb. O, "SSRİ dönəmində yaşayan qazaxlar kiril qrafikası ilə yazıblar, Çində yaşayanlar isə tote jazudan istifadə edib, Qərbdə yaşayanlar isə latım qrafikasından yararlanıblar. Bizim ümumi dilimiz olmasına baxmayaraq, biz üç əlyazmasından istifadə etmişik və heç birimiz digərinin yazısını başa düşməmişik. Elm və texnologiyanın inkişafına baxmayaraq, bu, bütün dünyaya səpələnmiş qazax nəsilləri arasındakı əlaqəni kəsə bilər. Biz sözügedən problemin həlli üçün işlərə başlamışıq. Qazax dilinin latın qrafikasına keçidi bizi birləşdirəcək", - deyə bildirmişdi.

Nazarbayev əlavə olaraq bildirmişdi ki, Qazax alimləri əlifbanı hazırlaya bilərlər: "Bunun üçün Türkiyə təcrübəsindən istifadə edə bilərlər, qonşularımız - Azərbaycan, Özbəkistan artıq latın qrafikasına keçiblər. Onların nöqsanlarını öyrənərək, bizə öz əlifbamızı hazırlamalıyıq. Bu çətin deyil, ona görə ki, 1 sinifdən başlayaraq bütün uşaqlara ingilis dilini öyrədirlər. Və bizə çətin olmayacaq."

Qazaxıstanda 1920-ci ilədək ərəb qrafikalı əlifbadan istifadə edilib. 1920-40-cı illərdə latın qrafikalı əlifbadan, 1940-cı ildən isə 42 hərfli kiril qrafikalı əlifbadan istifadə edilib.