İraq Kürd Regional Rəhbərliyinin lideri Məsud Bərzani istefa verdikdən sonra ilk dəfə bəyanatla çıxış edib. O, bildirib ki, Kərkükdə baş verənlər onun üçün böyük bir xəyanət olub. 

"16 oktyabr gecəsi Kərkükdə baş verənlər böyük bir xəyanətdir. Kərkük təslim edildi və zəhərli xəncər həm xalqımız, həm də Peşmərgənin kürəyinə sancıldı",-deyə Məsud Bərzani söyləyib. 

Peşmərgəyə hücum edən "Həşdi Şabi" qüvvələrinin ABŞ istehsalı olan silahlardan istifadə etdiyini bildirən Bərzani, "Qəribə haldır. ABŞ-ın terrorçu elan etdiyi şəxslər "Abraham" tanklara minib kürdlərə hücum edir və qarşı tərəf də buna tamaşa edir. Burada bir problem var. Görəsən, ABŞ buna niyə səssiz qalır?",-deyə vurğulayıb.