Ukranyanın paytaxtı Kiyevdə Rusiya prezidenti Vladimir Putinə sui-qəsd planı hazırlamaqda ittiham olunan çeçen əsilli Adam Osmayev silahlı hücuma məruz qalıb. Ukraynanın Daxili İşlər Nazirliyi faktı təsdiqləyib. 

Bildirilir ki, Kiyevin Hlevaha qəsəbəsində Adam Osmayevin avtomobilinə təşkil olunan hücumda özü yaralanıb, xanımı Aminə Okuyeva isə həyatını itirib. Silahlı hücum zamanı öldürülən A.Okuyeva Ukrayna ordusunun nəzdində Donbas əməliyyatlarında iştirak edirdi. 

Hücumu hələlik heç kim öz üzərinə götürməyib.

Qeyd edək ki, 2012-ci ildə Rusiya hökuməti Osmayevin Putini öldürməyi planlaşdıran terror qruplaşmasının üzvü olduğunu açıqlamışdı. İddialara əsasən, çeçen əsilli şəxs Putinin gündəlik istifadə etdiyi "Kutuzovski" meydanına mina döşəməyi planlaşdırırmış.

Buna qədər Moskva Osmayevin ekstradisiyanı tələb etsə də, Ukrayna tərəfi bundan imtina etmişdi.