İranın vəzifəli generallarından biri Fransa prezidenti Emmanuel Macron-u “cavan və təcrübəsiz” adlandırıb.

Buna səbəb Macron-un İranın ballistik raket proqramına dair Səudiyyə Ərəbistanında dedikləri olub.

39 yaşlı Fransa prezidenti demişdi ki, Tehran daha az aqressiv olmalı və özünün ballistik raket proqramına aydınlıq gətirməlidir.

Lakin İnqilab Keşikçiləri Korpusunun komandanı Əli Cəfəri Fransa liderinin bəyanatını rədd edərək deyib ki, İran özünün müdafiə xarakterli raket proqramını danışıqlar masasına çıxarmayacaq.

Cəfəri, habelə deyib ki, Livandakı şiə Hizbullah hərəkatının tərksilah edilməsi barədə ümumiyyətlə söhbət gedə bilməz.

“Hizbullah silahlandırılmalıdır ki, Livan xalqının düşməni olan İsrailə qarşı döyüşə bilsin. Təbiidir ki, Livanın təhlükəsizliyini qorumaq üçün onlara ən təkmil silahların verilməsi lazımdır” -general deyib.

“Express” yazır ki, sünni Səudiyyə krallığı ilə şiə İranı arasındakı regional rəqabət indiyədək Suriya, İraq, Yəmən və Bəhreyn kimi ölkələrdə sabitliyin pozulmasına səbəb olub.

Səudiyyə Ərəbistanı İranın dəstəklədiyi Hizbullahı Yəməndəki huti qiyamçılarını silahlandırmaqda və hutilərin krallığın ərazisinə raket atmasında ittiham edir. İran və Hizbullah bu ittihamları əsassız adlandırırlar.

Cəfəri mübahisəli ballistik raket proqramı məsələsində Tehranın mövqeyini bir daha müdafiə edib. General bildirib ki, İranın raket proqramı sırf müdafiə xarakteri daşıyır və buna görə də müzakirə mövzusu ola bilməz.

Tehran bunu da bildirir ki, ballistik raketlər proqramı İranın 2015-ci ildə dünya gücləri ilə imzaladığı nüvə sazişinə daxil deyildi və buna görə də Tehranın üzərindən sanksiyaların qaldırılması ilə heç bir əlaqəsi yoxdur.

“İran özünün müdafiə proqramına dair heç kimlə danışıq aparmayacaq, – Cəfəri deyib, – Macron-un bu məsələni qaldırması onun cavanlığından və təcrübəsizliyindən irəli gəlir”.

Bu həftə 39 yaşlı Macron İran prezidenti Həsən Ruhani və İsrail baş naziri Benjamin Netanyahu ilə telefon söhbətlərində onlardan Livanı regional böhrandan “kənarda” saxlamağı rica edib.

Macron-un ofisi bunu da bildirib ki, Fransa prezidenti hər iki liderlə söhbətində Parisin nüvə sazişinə sadiq qaldığını xatırladıb.

Macron deyib ki, İranın ballistik raket proqramı nüvə sazişindən ayrılıqda müzakirə olunmalıdır.

“Express” yazır ki, Səudiyyə Ərəbistanı ilə İran arasında münasibətlərin gərginləşməsi son həftələrdə Üçüncü Dünya Müharibəsi barədə söz-söhbətin yenidən dövriyyə etməsinə səbəb olub.

Səudiyyə Ərəbistanı deyib ki, özünü İrandan qorumaq üçün mümkün olan bütün vasirtələrdən istifadə edəcək.

Bundan başqa, Səudiyyə başda olmaqla Ərəb liqası ölkələri İranı ərəblərin daxili işlərinə qarışmaqda ittiham edib.