Pakistanda paytaxt İslamabadda 20 gündən çox davam edən aksiyalar ədliyyə naziri Zahid Həmidin istefası ilə nəticələnib. Federal hökumət təhlükəsizlik qüvvələrinin müdaxiləsi ilə də dağılmayan nümayişçilərin liderlərindən biri ilə görüşüb və narazı kütlənin istefa tələbini qəbul edib.

Qeyd edək ki, Pakistanın paytaxtı İslamabaddaki mitinqlər seçki məcəlləsindəki dəyişikliyə etiraz olaraq başlamışdı. Nümayişçilər və təhlükəsizlik qüvvələri arasında baş verən qarşıdurmada bu günə qədər 6 nəfər həlak olmuş, 250-dən çox insan yaralanmışdı.

Narazı kütlənin sözçüsü Əjaz Əşrəfi, "Ən böyük tələbimiz qəbul edilib",-deyə bildirərək və bu səbəbdən aksiyaların dayandırılacağını elan edib. 

Qeyd edək ki, ölkədə gərginlik millət vəkilliyinə namizədlərin imzaladığı mətndə “And içirəm ki, Hz.Məhəmməd son peyğəmbərdir” ifadəsinin “İnanıram ki, Hz.Məhəmməd son peyğəmbərdir” ifadəsi ilə əvəz edilməsindən sonra yaranıb.