Iraqın baş naziri Heydər əl-İbadi Bağdadda keçirdiyi həftəlik mətbuat konfransında Kürdüstan muxtar vilayətində baş verən etiraz aksiyalarına münasibət bildirib. O, qeyd edib ki, bölgədə baş verən mitinqlər Kürdüstan regional hökumətinin yanlış siyasətinin göstəricisidir. 

İraq Kürdüstan Regional Birliyinin təhlükəsizlik qüvvələrini nümayişçilərə xəsarət yetirməməyə çağıran əl-İbadi əlavə edib ki, vətəndaşların sərbəst toplaşmaq hüququnu əllərindən alımaq  qəbuledilməzdir: "Şimaldakı mitinqlər Kürdüstan regional hökumətinin yanlış siyasətindən qaynaqlanır. Mərkəzi hakimiyyətin vəzifəsi ölkənin bütün bölgələrində vətəndaşların can və mal təhlükəsizliyini qorumaqdır. Nümayişçilərə xəsarət yetiriləcəyi təqdirdə müdaxilə edə bilərik" .

Qeyd edək ki, Kürdüstanın Süleymaniyyə şəhərində dünəndən başlayan hökumət əleyhinə nümayişlərdə 5 nəfərin həyatını itirib, 93 nümayişçi yaralanıb. Nümayişlərə səbəb Kürdüstan rəhbərliyinin idarələrdə işləyən vətəndaşlara maaşları vaxtında verə bilməməsidir.