Türkiyə rəhbərliyi Suriyanın Afrin şəhərində apardığı "Zeytun budağı" əməliyyatında döyüşməsi üçün İŞİD-in keçmiş yaraqlılarına təlim keçərək onları "Azad Suriya Ordusu" adlı qruplaşmasına daxil edib. FaktXəbər-in verdiyi məlumata görə, bu iddianı İngiltərənin "İndependent" qəzeti irəli sürüb.

İddiaya əsasən, "Fərəc" kod adlı terrorçu "İndependent" qəzetinə verdiyi müsahibədə bildirib ki, Afrində YPG-yə qarşı döyüşənlərin əksəriyyəti İŞİD terror təşkilatının sabiq yaraqlılarıdır. Onlar Türkiyə hərbçiləri tərəfindən təlim aldıqdan sonra "Azad Suriya Ordusu" nun sıralarına daxil edilib.

"Türkiyə əməliyyatın əvvəlində "İŞİD"ə qarşı vuruşduğunu söyləyərək insanları aldatmağa çalışıb. Həqiqətdə isə İŞİD üzvlərinə təlimat verərək onları Afrinə göndərir",-deyə terrorçu əlavə edib.

Qeyd edək ki, Suriyanın Afrin şəhərində aparılan əməliyyatda 10 mindən çox "Azad Suriya Ordusu"nun üzvü iştirak edir.

"İndependent" qəzeti mövzu ilə bağlı Türkiyə rəsmilərdən münasibət ala bilmədiyini də yazıb.