Amerikanın Florida ştatının Orlando şəhərindəgirov götürülən 4 uşaq ölü tapılıb. Hücumçu əvvəlcə onları qətlə yetirib, sonra isə intihar edib.

Hadisə bazar günü baş verib. Polis evdə zorakılıq çağırışı ilə ünvana yollanıb, lakin davakar kişini saxlamağa cəhd edərkən  isə ciddi şəkildə yaralanıb. Hücumçu isə 1-12 yaş arası 4 uşaqla mənzildə gizlənib.

Məlum olub ki, hücumçu mütəmadi olaraq həbsdə yatıb-çıxan, hazırda da sınaq müddətində olan evi sahibi 35 yaşlı Qeri Ueyn Lindsi olub.

Polis rəisinin sözlərinə görə, hüquqmühafizəçilər danışıqlar aparmaq üçün hücumçuya telefon vermək istəyiblər, lakin uşaqlardan birinin artıq öldüyünü görüblər. O zaman digərlərini xilas etmək məqsədiylə mənzilə hücum keçirilib.

Əməliyyat zamanı uşaqların hamısının öldüyü aydın olub. Cinayətkarın öz cəsədi isə dolabın içində tapılıb. 

Hazırda kişinin belə bir addım atmasının səbəbləri araşdırılır.

Hüquqmühafizəçilərin məlumatına görə, ölən uşaqlar arasında hücumçunun öz övladları da olub. Digər iki uşaq isə cinayətkarın rəfiqəsinin olub.