Almaniya İqtisadiyyat Nazirliyinin enerji təchizatı sahəsində əsas vəzifələrdə çalışan iki yüksək vəzifəli əməkdaşı Rusiyaya işləyə bilər.

Musavat.com xarici agentliklərə istinadən xəbər verir ki, bu barədə “Die Zeit” qəzetində məlumat yayılıb.

Qəzetin informasiyasına görə, onların işi Almaniya Konstitusiyasının Müdafiəsi üzrə Federal İdarəsi (BfV-Əks-kəşfiyyat) tərəfindən aparılır.

Əgər bu məlumat təsdiqlənərsə, federal hökuməti növbəti fiasko gözləyir. Əks halda, iqtisadiyyat naziri Robert Habek bunu ətraflı izah etməli olacaq.

Qəzetin yazdığına görə, “Şimal axını 2” qaz kəməri ilə bağlı daxili sənədlərin tədqiqi, qaz anbarlarının doldurulması, eləcə də Almaniyanın tədarükünün təhlükəsizliyinə dair hesabatlarda ciddi uyğunsuzluqlar aşkarlanıb. Həmin sənədlər daha çox Rusiyanın nöqteyi-nəzərini əks etdirib və arqumentlər çox vaxt Almaniya hökumətinin rəsmi xəttinin əleyhinə olub..

BfV bununla bağlı vəziyyəti şərh etməkdən imtina edib.

“Die Zeit” bu vaxta qədər Almaniyanın İqtisadiyyat və İqlim Mühafizəsi Nazirliyinin əməkdaşlarının casusluq və ya korrupsiya ittihamı ilə üzləşəcəkləri ilə bağlı tutarlı sübut tapılmadığını bildirir.