"Rusiya prezidenti Vladimir Putin "əvəz-əvəz" prinsipi ilə yaşayır".Bu sözləri ABŞ-ın sabiq dövlət katibi Kondoliza Rays "CBS News" telekanalına müsahibəsində deyib. Amerikalı siyasətçi bildirib ki, rəsmi Vaşinqton Rusiyada 2012-ci ildə keçirilən prezident seçkiləri zamanı Kreml rəhbərini nəticələri saxtalaşdırmaqda ittiham etmişdi və görünən budur ki, qarşı tərəf buna görə ABŞ-da keçirilən seçkilərə təsir etməklə intiqam aldı.

Kondoliza Rays müsahibə zamanı Vladimir Putinlə bağlı daha sonra bunları deyib "O, ilk növbədə kütləvi informasiya vasitələrinə, xüsusi ilə də elektron KİV-ə zərbə vurub. Öz opponentlərini təqib etməyə başlayıb və son vaxtlar onun rəqibləri ölürlər. Mən inanmıram ki, hər şeydə yalnız bir nəfər günahkardır. Gördüyümüz kimi, Rusiya institutlarında demokratiya ilə bağlı möhkəm təməl sadəcə yoxdur. Mən təşviş içindəyəm. Əgər siz məndən soruşsanız ki, bunun arxasında nə durur, mən cavab verəcəyəm: Bəli, mən - rusiyaşünasam və mən Vladimir Putini tanıyıram. Məhz buna görə də mən deyirəm ki, ona sevinmək üçün bəhanə verməyin və ona fikirləşməyə imkan verməyin. Çünki o, artıq bizim seçkilərdə əminliyimizi qıra bilib. O, elə bir adamdır ki, "əvəz-əvəz" prinsipi ilə yaşayır. Biz 2012-ci ildə onun keçirdiyi seçkiləri saxta adlandırmışdıq və bu, reallıqda belə idi. Baxın, indi o bizim seçkiləri saxtalaşdırdı".